കോട്ടയം: ജോലി കഴിഞ്ഞു മടങ്ങിയ കെഎസ്ആർടിസി കണ്ടക്‌ടര്‍ ബൈക്ക് അപകടത്തിൽ മരിച്ചു. കോട്ടയം അമയന്നൂർ സ്വദേശി നെടുങ്കേരി പുളിയാമാക്കൽ എൻ വി അനിൽകുമാർ ആണ് (52) മരിച്ചത്. അനിൽകുമാർ ഓടിച്ച ബൈക്ക് മതിലിൽ ഇടിച്ചാണ് അപകടം ഉണ്ടായത്.
ശനിയാഴ്ച പുലർച്ചെ ആറരയോടെ മണർകാട് ജംഗ്ഷനിൽ ആയിരുന്നു അപകടം. ജോലിയുടെ ക്ഷീണത്താൽ ബൈക്ക് ഓടിക്കവേ അനിൽകുമാർ ഉറങ്ങിപ്പോയതാണ് അപകടകാരണമെന്ന് കരുതുന്നു. ഇടിയുടെ ആഘാതത്തിൽ അനിൽ കുമാറിന്‍റെ തലയ്ക്ക് ഗുരുതര പരിക്കേറ്റു.
രക്തം വാർന്ന് അരമണിക്കൂറോളം റോഡില്‍ കിടന്ന അനിൽ കുമാറിനെ ആശുപത്രിയിലെത്തിക്കാൻ ആരും തയ്യാറായില്ലയെന്നു പറയുന്നു. അപകട സ്ഥലത്തിനടുത്തുള്ള സ്വകാര്യ ആശുപത്രിയിൽ നിന്ന് ആംബുലൻസ് എത്തി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഹെൽമറ്റ് അടക്കം മുഖത്ത് തറഞ്ഞ് കയറിയിരുന്നു.
ഭാര്യ അയർക്കുന്നം പ്രാഥമിക ആരോഗ്യ കേന്ദ്രത്തിലെ നെഴ്‌സ് ആണ്. കോട്ടയം കെഎസ്ആർടിസി ഡിപ്പോ യൂണിയൻ നേതാവ് കൂടിയാണ് അനിൽകുമാർ.
