സബ്‌സിഡിക്കായി ഉയര്‍ന്നവില നൽകി മത്സ്യങ്ങൾ വാങ്ങി ; വിപണി കണ്ടെത്താനാകാതെ കർഷകർ

ടാങ്കുകളിൽ വളർത്തുന്ന മത്സ്യത്തിന് വിപണി ഇല്ലാതായതോടെ കൃഷി പ്രതിസന്ധിയില്‍

കോട്ടയം : വിപണി കണ്ടെത്താനാകാതെ മത്സ്യ കർഷകർ. ബയോ ഫ്ലോക്ക് കൃഷി രീതിയിൽ 'പ്രധാനമന്ത്രി മത്സ്യ സമ്പദ് യോജന' പദ്ധതി വഴി എഴരലക്ഷത്തോളം രൂപ കടമെടുത്ത് കൃഷിയാരംഭിച്ചവരാണ് വിപണി കണ്ടെത്താനാകാതെ ബുദ്ധിമുട്ടിലായത്.

സബ്‌സിഡി കിട്ടുന്നതിനായി അമിത വില കൊടുത്താണ് മത്സ്യ കുഞ്ഞുങ്ങളെ ഇവർ വാങ്ങിയത്. എന്നാൽ മത്സ്യം ഏറ്റെടുക്കാനോ ന്യായവില ലഭ്യമാക്കാനോ മത്സ്യഫെഡ് തയാറായിട്ടില്ല. ഇതുമൂലം ലക്ഷങ്ങൾ മുടക്കി മത്സ്യ കൃഷിയാരംഭിച്ചവർ സാമ്പത്തിക പ്രതിസന്ധിയിലായി.

മത്സ്യങ്ങൾക്ക് വളർച്ച കുറഞ്ഞതും വെട്ടിലാക്കി

ടാങ്കുകളിൽ വളർത്തുന്ന മത്സ്യത്തിന് വിപണി ഇല്ലാതായി. സബ്‌സിഡിക്ക് വേണ്ടി അധിക വില നൽകിയാണ് ഇവർ മീൻ കുഞ്ഞുങ്ങളെ വാങ്ങിയത്. ഇവയ്ക്ക് വളർച്ച കുറവായതും കർഷകരെ ബുദ്ധിമുട്ടിലാക്കി. കൊവിഡ് മൂലം ജോലി നഷ്‌ടപ്പെട്ട് നാട്ടിൽ മടങ്ങിയെത്തിയ പലരും മത്സ്യകൃഷി തുടങ്ങി കടക്കെണിയിലായിരിക്കുകയാണ്.

വല്ലാർപാടത്തുനിന്നും മറ്റ് ഹാച്ചറികളിൽ നിന്നുo ഒരു മത്സ്യക്കുഞ്ഞിന് എട്ട് രൂപ കൊടുത്താണ് ഇവർ വാങ്ങിയത്. ട്രാൻസ്പോർട്ടേഷൻ കൂടിയാകുമ്പോൾ വില പത്ത് രൂപയാകും. മൂന്നുമാസം കൊണ്ട് ഒരു മത്സ്യം 300 ഗ്രാം തൂക്കത്തിൽ വളരുമെന്നായിരുന്നു മത്സ്യഫെഡിന്‍റെ ഉറപ്പ്. എന്നാൽ ആറുമാസം കഴിഞ്ഞിട്ടും 250 ഗ്രാം പോലും തൂക്കമുണ്ടായില്ലെന്ന് കർഷകർ പറയുന്നു.

മീനിന് രുചി ഇല്ലാതായതോടെ ആവശ്യക്കാരുമില്ല

300 ഗ്രാം തൂക്കം കിട്ടാൻ 180 രൂപയുടെ മുടക്ക് വരും. അതിനാൽ കിലോയ്ക്ക് 250 രൂപയെങ്കിലും കർഷകർക്ക് കിട്ടണം. ഇപ്പോൾ 200 രൂപയ്ക്ക് മത്സ്യം വെട്ടിക്കൊടുക്കുകയാണ്. ഇതിന് പുറമേ ദിവസം 1500 രൂപ മത്സ്യങ്ങൾക്ക് തീറ്റ വാങ്ങാനും വേണം.

എന്നാൽ 80 രൂപയ്ക്ക് ഈ മീനുകൾ കച്ചവടക്കാർക്ക് എത്തിച്ചുകൊടുക്കുന്ന മത്സ്യ ലോബികൾ ഈ സംരഭകരെ പ്രതിസന്ധിയിലാക്കി. കോഴി വേസ്റ്റും മത്സ്യങ്ങളുടെ അവശിഷ്ടങ്ങളും കൊടുത്ത് പാടത്ത് കൃഷി ചെയ്യുന്ന മീനിന്‍റെ അത്ര രുചി ഇല്ലാത്തതും തിരിച്ചടിയായി.

ഒറ്റവിളവെടുപ്പിൽ മുടക്ക് മുതൽ തിരികെ കിട്ടുമെന്ന് മോഹിച്ച് കൃഷിയിറക്കിയവർ പ്രതിസന്ധിയിലായിരിക്കുകയാണ്. കൊവിഡ് മൂലം വിദേശത്തെ ജോലി നഷ്‌ടപ്പെട്ട കോട്ടയം ചിങ്ങവനം സ്വദേശി സജീഷ് മത്സ്യകൃഷിയ്ക്കിറങ്ങി നഷ്‌ടത്തിലായ കർഷകരിൽ ഒരാളാണ്.

മത്സ്യകൃഷിയിൽ നിന്ന് ലഭിക്കുന്ന ചെറിയ വരുമാനം തീറ്റയ്ക്കും മത്സ്യ ഫാമിലേക്കുള്ള കറന്‍റ് ചാർജിനും തികയുന്നില്ലെന്ന് സജീഷ് പറയുന്നു.

പദ്ധതി ബാധ്യതയെന്ന് കർഷകർ

സംസ്ഥാന ഫിഷറീസ് വകുപ്പിന്‍റെ നേതൃത്വത്തിലാണ് കേരളത്തിൽ ഈ പദ്ധതി നടത്തുന്നത്. എന്നാൽ ഫലത്തിൽ കർഷകർക്ക് ഇത് ബാധ്യത ആയിരിക്കുകയാണ്. ആനുകൂല്യം ലഭിക്കണമെങ്കിൽ ഫിഷറീസ് വകുപ്പ് നൽകുന്ന മീൻ കുഞ്ഞുങ്ങളെ മാത്രമേ ടാങ്കിൽ നിക്ഷേപിക്കാൻ അനുവദിച്ചിരുന്നുള്ളൂ.

പൊതു വിപണിയിൽ ഒരു രൂപ അമ്പതു പൈസ വിലയുള്ള ഗിഫ്റ്റ് തലോപ്പി കുഞ്ഞുങ്ങളെ പത്ത് രൂപയ്ക്കാണ് ഫിഷറീസ് വകുപ്പ് കർഷകർക്ക് നൽകിയത്. ഒരേ ഇനത്തിലുള്ള മീനുകൾ വളർത്തുന്നതും വിപണി ഇല്ലാതാക്കി.

രോഹു, കരിമീൻ, പൂമീൻ തുടങ്ങിയവ കൂടി ഫിഷറീസ് നൽകണമെന്നും കർഷകർ ആവശ്യപ്പെടുന്നു. ഈ സാഹചര്യത്തിൽ കർഷകരുടെ മീനുകൾ സംഭരിച്ച് വിൽപ്പന നടത്താന്‍ നടപടി സ്വീകരിക്കണമെന്നാണ് കർഷകർ ആവശ്യപ്പെടുന്നത്.