കോട്ടയം: ഫയൽ തീർപ്പാക്കൽ തീവ്രയജ്ഞ പരിപാടിയുടെ ഭാഗമായി ജില്ലയിൽ 47,819 ഫയലുകൾ തീർപ്പാക്കിയതായി സഹകരണ-സാംസ്‌കാരിക വകുപ്പു മന്ത്രി വി.എൻ വാസവൻ. മെയ് 31ലെ കണക്കു പ്രകാരം വിവിധ വകുപ്പുകളിലായി 90,745 ഫയലുകളാണ് തീർപ്പാക്കാനുണ്ടായിരുന്നത്. ജൂലൈ 25 വരെ 52.69% ഫയലുകൾ തീർപ്പാക്കി. 42,926 ഫയലുകൾ തീർപ്പാക്കാനുള്ള നടപടികൾ പുരോഗമിക്കുകയാണെന്ന് മന്ത്രി അറിയിച്ചു.
ഓഗസ്റ്റ് 31നകം 75% ഫയലുകൾ തീർപ്പാക്കുന്നതിന് ഊർജിത നടപടി സ്വീകരിക്കാൻ വകുപ്പുകൾക്ക് മന്ത്രി നിർദേശം നൽകി.
മലിനീകരണ നിയന്ത്രണ ബോർഡ്(100%), ടൂറിസം(92.64%), ജല അതോറിറ്റി(85.82%), പൊതുമരാമത്ത് ഇലക്ട്രിക്കൽ വിഭാഗം(83.33%), ജില്ല ഇൻഷുറൻസ് ഓഫിസ് (79.46%), മെഡിക്കൽ കോളജ് പ്രിൻസിപ്പൽ ഓഫിസ് (79.24%), ആർ.ടി.ഒ (70.50%), മൃഗസംരക്ഷണം (67.84%), വിജിലൻസ് ആൻഡ് ആന്‍റീ കറപ്ഷൻസ് ബ്യൂറോ(65.71%), ഫിഷറീസ് (61.25%), ജില്ല ഇൻഷുറൻസ് ഓഫിസ് ഇൻഷുറൻസ് മെഡിക്കൽ സർവീസ്(58.33%), ടൗൺ പ്ലാനിങ് (54.91%), പൊലീസ്(54.47%), തദ്ദേശ സ്വയംഭരണം(53.10%), ഭക്ഷ്യ-പൊതുവിതരണം(50.01%), തൊഴിൽ (52.43%), ജി.എസ്.ടി(50.16%) എന്നിവയാണ് 50 ശതമാനത്തിനു മുകളിൽ ഫയലുകൾ തീർപ്പാക്കിയ വകുപ്പുകൾ. ഓഗസ്റ്റ് മൂന്നാംവാരം വീണ്ടും അവലോകന യോഗം ചേരുമെന്ന് മന്ത്രി പറഞ്ഞു.
ഫയൽ തീർപ്പാക്കുന്നതിനായി കൃഷി വകുപ്പ് ബ്ലോക്ക് തല അദാലത്ത് സംഘടിപ്പിക്കും. ഭക്ഷ്യ-പൊതുവിതരണ വകുപ്പിന്‍റെ നേതൃത്വത്തിൽ താലൂക്ക് തല അദാലത്ത് സംഘടിപ്പിക്കും. ഒക്ടോബർ പത്തിനകം ഓരോ വകുപ്പും പുരോഗതി സംബന്ധിച്ച വിവരങ്ങൾ പ്രസിദ്ധീകരിക്കും. ഉദ്യോഗസ്ഥ ഭരണപരിഷ്‌കാര വകുപ്പ് സമാഹൃത തീർപ്പാക്കൽ വിശദാംശം ഒക്ടോബർ 15നകം പ്രസിദ്ധീകരിക്കുമെന്നും മന്ത്രി പറഞ്ഞു.
ഫയലുകൾ വേഗത്തിൽ തീർപ്പാക്കുന്നതിനായുള്ള തീവ്രയജ്ഞ പരിപാടിയുടെ പുരോഗതി വിലയിരുത്തുന്നതിനായി കലക്‌ട്രേറ്റിൽ കൂടിയ ജില്ലാതല അവലോകന യോഗത്തിൽ അധ്യക്ഷത വഹിക്കുകയായിരുന്നു മന്ത്രി. കൊവിഡ് കാലത്ത് ഫയലുകൾ തീർപ്പാക്കാൻ ഉണ്ടായ കാലതാമസം മൂലം ഫയലുകൾ കെട്ടിക്കിടക്കാൻ ഇടയാക്കിയതിനെ തുടർന്നാണ് തീവ്രയജ്ഞം നടത്തുന്നത്.
