കോട്ടയം: ലോക്സഭാ തെരഞ്ഞെടുപ്പിൽ കോട്ടയം മണ്ഡലത്തിലെ വോട്ടെണ്ണലിനുള്ള ക്രമീകരണങ്ങൾ പൂർത്തിയായതായി ജില്ലാ കലക്ടർ പി കെ സുധീർ ബാബു. കോട്ടയം മൗണ്ട് കാർമൽ സ്കൂൾ, എംഡി സെമിനാരി സ്കൂൾ, ബസേലിയസ് കോളജ് എന്നിവിടങ്ങളിലാണ് കോട്ടയം മണ്ഡലത്തിലെ വോട്ടെണ്ണൽ നടക്കുക. നാളെ രാവിലെ എട്ടിന് വോട്ടെണ്ണൽ ആരംഭിക്കും. ഏഴ് കേന്ദ്രങ്ങളിലായാണ് വോട്ടെണ്ണൽ നടക്കുക. വോട്ടെണ്ണൽ കേന്ദ്രങ്ങളുടെ എല്ലാ ഒരുക്കങ്ങളും പൂർത്തിയായതായി ജില്ലാ വരണാധികാരി കൂടിയായ ജില്ലാ കലക്ടർ പി കെ സുധീർ ബാബു അറിയിച്ചു.
പിറവം മണ്ഡലത്തിലെ വോട്ടെണ്ണൽ എംഡി സെമിനാരി ഹയർ സെക്കൻഡറി സ്കൂൾ ഓഡിറ്റോറിയം, ഏറ്റുമാനൂർ മണ്ഡലത്തിലെ എംഡി സെമിനാരി ഹൈസ്കൂൾ ഓഡിറ്റോറിയം, പാലാ, കടുത്തുരുത്തി മണ്ഡലങ്ങളിലെ വോട്ടെണ്ണല്‍ മൗണ്ട് കാർമൽ എച്ച്എസ്എസ് സ്കൂൾ ഓഡിറ്റോറിയം എന്നിവിടങ്ങളിലായാണ് ക്രമീകരിച്ചിരിക്കുന്നത്. പുതുപ്പള്ളി മണ്ഡലത്തിലെ വോട്ടെണ്ണലും പോസ്റ്റൽ ബാലറ്റുകളുടെ എണ്ണലും ബസേലിയസ് കോളജ് ഓഡിറ്റോറിയത്തിലും, വൈക്കം മണ്ഡലത്തിലെ മൗണ്ട് കാർമൽ ബിഎഡ് ട്രെയിനിങ് കോളജ് ഓഡിറ്റോറിയത്തിലും നടക്കും.
