കോട്ടയം : Railway Job Offer Fraud: റെയില്‍വേയില്‍ ജോലി വാഗ്‌ദാനം നല്‍കി നൂറുകണക്കിന് ആളുകളില്‍ നിന്നും ലക്ഷക്കണക്കിന്‌ രൂപ തട്ടിയെടുത്ത അന്തര്‍ സംസ്ഥാന കുറ്റവാളി അറസ്‌റ്റില്‍. റെയില്‍വേ റിക്രൂട്ട്മെന്‍റ്‌ ബോര്‍ഡിലെ ഉയര്‍ന്ന ഉദ്യോഗസ്ഥന്‍ ആണെന്ന് പരിചയപ്പെടുത്തി ആളുകളില്‍ നിന്നും റെയില്‍വേയില്‍ ടിക്കറ്റ് ക്ലാര്‍ക്ക് , ലോക്കോ പൈലറ്റ്‌, അസിസ്‌റ്റന്‍റ്‌ സ്‌റ്റേഷന്‍ മാസ്‌റ്റര്‍ തുടങ്ങിയ ജോലികള്‍ തരപ്പെടുത്തി നല്‍കാമെന്ന് പറഞ്ഞ് ലക്ഷക്കണക്കിന്‌ രൂപ തട്ടിയെടുത്ത കാസര്‍കോട്‌ കാഞ്ഞങ്ങാട് കമ്മാടം കുളത്തിങ്കല്‍ വീട്ടില്‍ ഷമീം പി (33) ആണ് അറസ്‌റ്റിലായത്.
Inter State Criminal Arrested: ഷമീം പുഴക്കര, ഷാനു ഷാന്‍ എന്നീ അപര നാമങ്ങള്‍ ഉപയോഗിച്ചാണ് ഇയാള്‍ തട്ടിപ്പ് നടത്തുന്നത്. തട്ടിപ്പിനിരയായവരില്‍ ചിലര്‍ കഴിഞ്ഞ ദിവസം കോട്ടയം ഡി.വൈ.എസ്.പി ജെ സന്തോഷ്‌ കുമാറിന്‌ പരാതി നല്‍കിയതിനെ തുടര്‍ന്നാണ്‌ ഇയാള്‍ പിടിയിലായത്. തുടര്‍ന്ന് ജില്ലാ പൊലീസ് മേധാവി ഡി ശില്‍പ ഐ.പി.എസിന്‍റെ നിര്‍ദേശമനുസരിച്ച് സബ് ഇന്‍സ്‌പെക്‌ടര്‍മാരായ കെ ആര്‍ പ്രസാദ്, ഷിബുക്കുട്ടന്‍ വി എസ്, അസിസ്‌റ്റന്‍റ്‌ സബ് ഇന്‍സ്‌പെക്‌ടര്‍ അരുണ്‍ കുമാര്‍ കെ ആര്‍, സീനിയര്‍ സിവില്‍ പൊലീസ് ഓഫിസര്‍ രാധാകൃഷ്‌ണന്‍ കെ.എന്‍, സിപിഒ ശ്രാവണ്‍ കെ ആര്‍ എന്നിവര്‍ ചേര്‍ന്നാണ് പ്രതിയെ പിടികൂടിയത്.
കയ്യില്‍ ഒറിജിനലിനെ വെല്ലുന്ന സര്‍ട്ടിഫിക്കറ്റുകളും ഐഡി കാര്‍ഡുകളും
തിരുവനന്തപുരത്ത് ഒളിവില്‍ കഴിയുകയായിരുന്ന ഇയാള്‍ ബെംഗളൂരുവിലേക്ക്‌ രക്ഷപ്പെടാന്‍ തയാറെടുക്കുന്നതിനിടെയാണ് പൊലീസിന്‍റെ പിടിയിലാകുന്നത്. റെയില്‍വേ റിക്രൂട്ട്മെന്‍റ്‌ ബോര്‍ഡിന്‍റെ ഒഎംആര്‍ ഷീറ്റുകള്‍, മെഡിക്കല്‍ പരിശോധന സര്‍ട്ടിഫിക്കറ്റുകള്‍, വിവിധ സീലുകള്‍, നിയമന ഉത്തരവുകള്‍, സ്ഥലം മാറ്റ ഉത്തരവുകള്‍ എന്നിവ ഒറിജിനലിനെ വെല്ലുന്ന രീതിയില്‍ വ്യാജമായി ഉണ്ടാക്കിയാണ് ഇയാള്‍ തട്ടിപ്പ് നടത്തിയിരുന്നത്. റെയില്‍വേ റിക്രൂട്ട്മെന്‍റ്‌ ബോര്‍ഡ് ചീഫ് എക്‌സാമിനര്‍, ചീഫ് ഇന്‍സ്‌പെക്‌ടര്‍ തുടങ്ങിയ പദവികള്‍ ഉള്ള സ്വന്തം ഫോട്ടോ ഒട്ടിച്ച ഐഡന്‍റിറ്റി കാര്‍ഡുകളും വ്യാജമായി നിര്‍മ്മിച്ച്‌ ഉപയോഗിച്ചുവരികയായിരുന്നു.
മെഡിക്കല്‍ ടെസ്‌റ്റിനായും, ഒഎംആര്‍ രീതിയിലുള്ള പരീക്ഷകള്‍ക്കായും ഇയാള്‍ ആളുകളെ ചെന്നൈ, ബെംഗളൂരു, ഡല്‍ഹി തുടങ്ങിയ സ്ഥലങ്ങളില്‍ വിളിച്ചുവരുത്തി ഹോട്ടല്‍ മുറികളില്‍ ഇരുത്തി പരീക്ഷകള്‍ നടത്തുകയാണ് പതിവ്. നൂറോളം ആളുകളില്‍ നിന്നായി നാല്‍പത്തിയെട്ട്‌ ലക്ഷം രൂപയുടെ തട്ടിപ്പാണ് ഇത്തവണ നടത്തിയിരിക്കുന്നത് എന്നാണ്‌ പ്രാഥമിക നിഗമനം. നീലേശ്വരം, പൂജപ്പുര, കഴക്കൂട്ടം, കോട്ടയം ഈസ്‌റ്റ്‌, കൊട്ടാരക്കര, ചാലക്കുടി, എറണാകുളം സൗത്ത്, സുല്‍ത്താന്‍ബത്തേരി, വെള്ളരിക്കുണ്ട്, ഹോസ്‌ദുര്‍ഗ് തുടങ്ങിയ പൊലീസ് സ്‌റ്റേഷനുകളില്‍ ഇതിനു മുന്‍പും സമാന രീതിയില്‍ തട്ടിപ്പ് നടത്തിയതിന്‌ ഇയാള്‍ക്കെതിരെ കേസ് രജിസ്‌റ്റര്‍ ചെയ്‌തിട്ടുണ്ട്.
മുന്പ് നടത്തിയത്‌ ഇരുന്നൂറ്‌ കോടിയുടെ തട്ടിപ്പ്
ഈ കേസുകളില്‍ ജാമ്യത്തില്‍ നടക്കുന്നതിനിടയില്‍ ആണ് വീണ്ടും തട്ടിപ്പ് ആവര്‍ത്തിക്കുന്നത്. ഇതിന്‌ മുന്പ് നടത്തിയ തട്ടിപ്പുകളില്‍ ഏകദേശം ഇരുന്നൂറ്‌ കോടിയില്‍ അധികം തുക ഇയാള്‍ കൈവശപ്പെടുത്തിയിട്ടുണ്ട് എന്നാണ്‌ പ്രാഥമിക നിഗമനം. നെടുമ്പാശേരി വിമാനത്താവളം വഴി വിദേശത്ത്‌ നിന്ന്‌ മുപ്പത്തിയേഴ്‌ കിലോ സ്വര്‍ണം കടത്തിയതിന് നെടുമ്പാശേരി പൊലീസ് കേസ് എടുക്കുകയും തുടര്‍ന്ന് കേസ് എന്‍ഫോഴ്‌സ്‌മെന്‍റ്‌ ഡയറക്‌ടറേറ്റ്‌ ഏറ്റെടുക്കുകയും ചെയ്‌തിട്ടുണ്ട്.
പത്താം ക്ലാസ് വിദ്യാഭ്യാസം മാത്രമുള്ള ഇയാള്‍ ട്രെയിനില്‍ പാന്‍റ്രി കാറില്‍ ജോലിക്കാരന്‍ ആയിരുന്ന സമയത്ത് ട്രെയിന്‍ ടിക്കറ്റ് എക്‌സാമിനറുടെ വേഷം ധരിച്ച് തട്ടിപ്പ് നടത്തിയതിന്‌ സേലം റെയില്‍വേ പൊലീസ് ഇയാള്‍ക്കെതിരെ കേസ് എടുത്തിരുന്നു. തട്ടിപ്പിലൂടെ സമ്പാദിച്ച പണം ബെംഗളൂരുവിലും മറ്റും പബുകളും ഡാന്‍സ്‌ ബാറുകളും വാങ്ങാന്‍ ഉപയോഗിച്ചെന്നാണ് പ്രാഥമിക നിഗമനം.
ALSO READ: 'നാട്ടുകാര്‍ കളിയാക്കുന്നു' ; കോട്ടയത്ത്‌ കുഞ്ഞിനെ കൊന്നതിന് അറസ്‌റ്റിലായ അമ്മയുടെ മൊഴി
