കോട്ടയം: പ്രതിസന്ധികളെ അതിജീവിച്ച് സബ് ഇന്‍സ്‌പെക്ടറായി ശ്രദ്ധേയമായ ആനി ശിവയെ പ്രൊബേഷന്‍ കാലത്ത് സി.കെ ആശ എം.എല്‍.എ ഓഫീസീല്‍ വിളിച്ചു വരുത്തി സല്യൂട്ട് ചെയ്യിപ്പിച്ചെന്ന് സമൂഹ മാധ്യമങ്ങളില്‍ വ്യാപക പ്രചാരണം. ബി.ജെ.പി നേതാവ് രേണു സുരേഷ് ഇതുമായി ബന്ധപ്പെട്ട കുറിപ്പ് സമൂഹ മാധ്യമത്തില്‍ പോസ്റ്റുചെയ്തിരുന്നു. തുടര്‍ന്നാണ് വിവാദമുയര്‍ന്നത്.
'പ്രചാരണം തെറ്റ്, സംഭവം അങ്ങനെയല്ല'
രാത്രി ഡ്യൂട്ടി കഴിഞ്ഞു താമസ സ്ഥലത്തേക്കു പോകുന്നതിനിടെ എം.എല്‍.എയെ കണ്ടപ്പോള്‍ ആനി ശിവ സല്യൂട്ട് ചെയ്തിതില്ല. ഇക്കാരണത്താല്‍ പിറ്റേന്ന് വിളിച്ചു വരുത്തി സല്യൂട്ട് ചെയ്യിപ്പിച്ചെന്നാണ് ഫെയ്‌സ്ബുക് കുറിപ്പ്. എന്നാല്‍, പ്രചാരണം തെറ്റാണെന്ന് സി.കെ ആശയും സംഭവത്തില്‍ പ്രതികരിക്കാനില്ലെന്ന് എസ്‌.ഐ ആനി ശിവയും പറഞ്ഞു.
‘നിയമസഭ തെരഞ്ഞെടുപ്പിനു മുന്‍പുള്ള ഒരു രാത്രിയാണ് സംഭവം. എന്‍.സി.സി യൂണിഫോമില്‍ ഒരാള്‍ തനിച്ചു നടന്നു വരുന്നത് കണ്ട് എവിടെ പോകുകയാണെന്ന് കാര്‍ നിര്‍ത്തി ചോദിച്ചു. ഡ്യൂട്ടിക്കു പോകുകയാണെന്ന് അവര്‍ മറുപടി പറഞ്ഞു. എന്‍.സി.സി കുട്ടികള്‍ക്ക് എന്ത് ഡ്യൂട്ടി എന്നു ചോദിച്ചപ്പോള്‍ എസ്‌.ഐ ആണെന്നു പറഞ്ഞു. പൊലീസുകാര്‍ക്ക് പ്രത്യേക സമയമുണ്ടോയെന്നും അവര്‍ എന്നോടു തിരികെ ചോദിച്ചു.
ആനിയുമായി സി.ഐ വീട്ടിലെത്തി, പിരിഞ്ഞത് സൗഹൃദത്തില്‍
മൂന്നു വട്ടം ചോദിച്ചപ്പോഴാണ് പേരുപറഞ്ഞത്. എന്നെ മനസിലായോ എന്ന് ചോദിച്ചപ്പോള്‍ നിങ്ങളുടെ പരിപാടിക്ക് ഡ്യൂട്ടി നോക്കിയിട്ടുണ്ട് എന്നാണ് മറുപടി പറഞ്ഞത്. ഈ സംഭവം വൈക്കം ഡി.വൈ.എസ്‌.പിയേയും സി.ഐയേയും അന്ന് രാത്രി തന്നെ അറിയിച്ചു. മറുപടിയൊന്നും ലഭിച്ചില്ല. മുഖ്യമന്ത്രിക്കു പരാതി നല്‍കി.
പിന്നീട് ആനി ശിവയെയും കൂട്ടി വൈക്കം സി.ഐ തന്‍റെ വീട്ടിലെത്തി. എം.എല്‍.എ ആണെന്നു മനസിലായില്ലെന്ന് ആനി ശിവ അന്ന് പറഞ്ഞു. പൊലീസ് വാഹനത്തിന്‍റെ ഡ്രൈവര്‍ വരാന്‍ വൈകിയതിന്‍റെ ദേഷ്യത്തില്‍ ആയിരുന്നു. അതിനാലാണ് അങ്ങനെ സംഭവിച്ചതെന്നാണ് അവര്‍ പറഞ്ഞു. സൗഹൃദത്തിലാണ് പിരിഞ്ഞതെന്നും സി.കെ ആശ പറഞ്ഞു.
ALSO READ: ഫോൺ പുഴയിൽ ഉപേക്ഷിച്ചതായി അർജുൻ; വിശ്വസിക്കാതെ കസ്റ്റംസ്
