കോട്ടയം: പ്രവാസിയായ വീട്ടമ്മയെ ആക്രമിച്ച കേസിൽ അറസ്റ്റിലായ പ്രതിയെ സംഭവ സ്ഥലത്തെത്തിച്ച് തെളിവെടുപ്പ് നടത്തി. പ്രവിത്താനം പാലക്കുഴക്കുന്നേൽ ബിബിൻ തോമസാണ് അറസ്റ്റിലായത്. കഴിഞ്ഞ ദിവസം പ്രവിത്താനം മാർക്കറ്റ് ജംഗ്ഷനിലാണ് സംഭവം. എന്നാല്‍ ആദ്യം വീട്ടമ്മയുടെ മൊഴി രേഖപ്പെടുത്താൻ പൊലീസ് തയ്യാറായില്ല എന്ന ആക്ഷേപം ഉയർന്നിരുന്നു.
പാലായില്‍ വീട്ടമ്മയെ ആക്രമിച്ച കേസിലെ പ്രതിയെ സ്ഥലത്തെത്തിച്ച് തെളിവെടുപ്പ് നടത്തി
ഇതേ തുടർന്ന് പാലാ ഡിവൈഎസ്‌പി നേരിട്ട് അന്വേഷണം ഏറ്റെടുക്കുകയായിരുന്നു. ഡിവൈഎസ്‌പി സാജു വർഗീസ്, സ്റ്റേഷൻ ഹൗസ് ഓഫീസർ അനൂപ് ജോസ് എന്നിവരുടെ നേതൃത്വത്തിലുള്ള പൊലീസ് സംഘം കഴിഞ്ഞ ദിവസം പെരിന്തൽമണ്ണയിൽ നിന്നാണ് പ്രതിയെ അറസ്റ്റ് ചെയ്തത്. അറസ്റ്റിലായ ബിബിൻ മുൻപും അടിപിടി കേസുകളിൽ പ്രതിയാണ്. സംഭവത്തിൽ ദൃക്‌സാക്ഷിയായ വ്യാപാരിയുടെ മൊഴിയും ഡിവൈഎസ്‌പി നേരിട്ട് രേഖപ്പെടുത്തുകയായിരുന്നു.
