കൊവിഡ് പ്രോട്ടോകോൾ ലംഘിച്ചു; പൊലീസ് ഉദ്യോഗസ്ഥന് സസ്പെൻഷൻ

മകൾക്ക് കൊവിഡ് സ്ഥിരീകരിച്ച ശേഷവും ഇയാൾ ഡ്യൂട്ടിക്ക് പോവുകയും മന്ത്രി ഉൾപ്പെടെ പങ്കെടുത്ത പരിപാടിയിൽ പങ്കെടുക്കുയും ചെയ്തതായാണ് റിപ്പോർട്ട്

കൊല്ലം: മകളെ കൊവിഡ് പരിശോധനയ്ക്കായി കൊണ്ടുപോവുകയും ഇക്കാര്യങ്ങൾ മറച്ചുവച്ച് ജോലിയിൽ തുടരുകയും ചെയ്ത കൊല്ലം പുത്തൂർ സ്റ്റേഷനിലെ ഗ്രേഡ് സബ് ഇൻസ്പെക്ടർക്ക് സസ്പെൻഷൻ. മകളുടെ കൊവിഡ് പരിശോധനാഫലം പോസിറ്റീവ് ആയതോടെയാണ് വിവരം പുറത്തറിഞ്ഞത്. ഡൽഹിയിൽ നിന്നും എത്തിയ മകളുടെ ശ്രവം പരിശോധനയ്ക്കായി എടുക്കുന്നതിന് കൊണ്ടുപോയതും തിരികെ കൊണ്ടുവന്നതും എസ്ഐ ആയിരുന്നു. പിന്നീട് സ്റ്റേഷനിൽ ഡ്യൂട്ടിയിൽ തുടരുകയും മന്ത്രി പങ്കെടുത്ത പരിപാടിയിൽ ഉൾപ്പെടെ പങ്കെടുക്കുകയും ചെയ്തതായാണ് വിവരം. ഇതോടെ സ്റ്റേഷനിലെ മുഴുവൻ പൊലീസുകാരും നിരീക്ഷണത്തിൽ പോകേണ്ട സാഹചര്യമാണ് നിലവിലുള്ളത്.