കൊല്ലം: ആകാംഷയും അറിവും നിറച്ച് ആരോഗ്യ വകുപ്പിന്റെയും അഗ്നിസുരക്ഷാ സേനയുടെയും മോക്ഡ്രിൽ. കൊട്ടാരക്കര താലൂക്ക് ആശുപത്രിയിലാണ് അറിവും അമ്പരപ്പും സമ്മാനിച്ച മോക് ഡ്രിൽ നടന്നത്. ആശുപത്രിയിലെ പുരുഷ വിഭാഗം മെഡിക്കൽ വാർഡിൽ പെട്ടന്നുണ്ടായ തീപിടിത്തത്തിൽ എന്ത്‌ ചെയ്യണമെന്നറിയാതെ രോഗികളും കൂട്ടിരിപ്പുകാരും പരിഭ്രാന്തരായി. ആശുപത്രി ജീവനക്കാരുടെയും അഗ്നിസുരക്ഷാ സേനയുടെയും അതിവേഗത്തിലുള്ള രക്ഷാപ്രവർത്തനങ്ങൾ കണ്ടിരിക്കെയാണ് മോക്ഡ്രിൽ പ്രഖ്യാപനം വന്നത്.
ആശുപത്രിയിൽ തീപിടിത്തം ഉണ്ടായാല്‍ എങ്ങനെ നേരിടാം എന്നതു സംബന്ധിച്ച ബോധവല്‍ക്കരണമായിരുന്നു ഇത് എന്ന ഫയര്ഫോഴ്സിന്റെ അറിയിപ്പ് ലഭിച്ചതോടെ പിരിമുറുക്കം ആശ്വാസത്തിന് വഴി മാറി. അപകടത്തില്‍പ്പെടുന്നയാളെ രക്ഷിക്കുന്നതും തീ അണയ്ക്കുന്നതും എങ്ങനെയെന്ന് അഗ്നി സുരക്ഷാ സേനാംഗങ്ങൾ വിശദീകരിച്ചു. അഗ്നി സുരക്ഷാ സേന കൊട്ടാരക്കര സ്റ്റേഷൻ ഓഫീസർ ടി. ശിവകുമാറിന്റെ നേതൃത്വത്തിലാണ് മോക്ഡ്രിൽ അവതരിപ്പിച്ചത്. അത്യാഹിതം സംഭവിച്ചാൽ അതിനെ എങ്ങനെ സംയമനത്തോടെ നേരിടാമെന്ന ബോധവൽക്കരണം ആശുപത്രി ജീവനക്കാർക്കും നൽകാൻ കഴിഞ്ഞുവെന്ന് ആശുപത്രി സൂപ്രണ്ട് ഡോ. കെ. ആർ. സുനിൽ കുമാർ പറഞ്ഞു.
ആശുപത്രികൾക്കായി പ്രത്യേക ദുരന്ത നിവാരണ പ്ലാൻ തയ്യാറാക്കുന്നതിന്റെ ഭാഗമായണ് ജില്ലാടിസ്ഥാനത്തിൽ പരിപാടി സംഘടിപ്പിച്ചതെന്ന് ജില്ലാ ഡെപ്യൂട്ടി മെഡിക്കൽ ഓഫിസർ ഡോ. ആർ. സന്ധ്യ പറഞ്ഞു. ഓരോ കെട്ടിടങ്ങൾക്കും ഓരോ ദുരന്ത നിവാരണ പ്ലാനാണ് തയ്യാറാക്കേണ്ടത്. അതിനാൽ തന്നെ ആശുപത്രികളുടെ ദുരന്തനിവാരണ പ്ലാൻ വളരെ പ്രധാന്യം അർഹിക്കുന്നതാണെന്നും ഡെപ്യൂട്ടി ഡി. എം.ഒ പറഞ്ഞു. ജില്ലാ ദുരന്തനിവാരണ അതോറിറ്റി, കെ.എസ്.ഇ.ബി, ജല വിഭവ വകുപ്പ്, കൊട്ടാരക്കര നഗരസഭഎന്നിവയുടെ പങ്കാളിത്തത്തോടെയാണ് പരിപാടി നടത്തിയത്.
കൊട്ടാരക്കര നഗരസഭാ അധ്യക്ഷ ബി. ശ്യാമള അമ്മ, ഉപാധ്യക്ഷൻ ഡി. രാമകൃഷ്ണപിള്ള, പൊലീസ് ഇൻസ്‌പെക്ടർ ടി. ബിനുകുമാർ, അഗ്നി സുരക്ഷ സേന അംഗങ്ങൾ, ജില്ലാ ദുരന്ത നിവാരണ അതോറിറ്റി അംഗങ്ങൾ, ആശുപത്രി ജീവവനക്കാർ തുടങ്ങിയവർ പങ്കെടുത്തു.
