കൊല്ലം : മലയാള സാഹിത്യ നിരൂപകൻ കെ.പി അപ്പന്‍റെ ഓർമ്മകൾ പുതുക്കി നവോദയം ഗ്രന്ഥശാലയുടെ സ്‌മൃതി സംഗമം. അദ്ദേഹത്തിന്‍റെ 13ാം ചരമ വാർഷികത്തോടനുബന്ധിച്ച്‌ നീരാവിൽ നവശക്തി ഓപ്പൺ എയർ ഓഡിറ്റോറിയത്തിൽ നടന്ന സ്‌മൃതി സംഗമം സ്‌പീക്കർ എം.ബി രാജേഷ് ഉദ്‌ഘാടനം ചെയ്‌തു.
M B Rajesh about K P Appan : മലയാള സാഹിത്യ നിരൂപണ രംഗത്തെ അതിശക്തനായിരുന്നു കെ.പി അപ്പൻ എന്ന് എം.ബി രാജേഷ്. 'ആധുനിക മലയാള സാഹിത്യ നിരൂപണത്തിന് തുടക്കമിട്ടത് അദ്ദേഹമാണ്. സർഗാത്മകതയുടെ സൗന്ദര്യവും ശക്തിയുമുള്ള നിരൂപണങ്ങളായിരുന്നു അദ്ദേഹത്തിന്‍റേത്‌. തന്‍റേതായ ശൈലിയിൽ മലയാള സാഹിത്യ നിരൂപണ രംഗത്ത് പ്രതിഭാശാലിയായിരുന്നു അദ്ദേഹം. ഭാവിയിലേക്ക് സഞ്ചരിക്കുന്ന വായനശാലയെന്ന് നവോദയ ഗ്രന്ഥശാലയെക്കുറിച്ച് കെ.പി അപ്പൻ പറഞ്ഞത് തികച്ചും ശരിയാണ്. നല്ലൊരു ഭാവി തലമുറയെ വാർത്തെടുക്കാൻ ഈ ഗ്രന്ഥശാല സഹായകരമാകും' -എം.ബി.രാജേഷ് പറഞ്ഞു.
ചടങ്ങിൽ 'ക്ഷോഭിക്കുന്നവരുടെ സുവിശേഷം' എന്ന പുസ്‌തകത്തിന്‍റെ രണ്ടാം പതിപ്പ് സ്‌പീക്കർ എം.ബി രാജേഷ് പ്രശസ്‌ത എഴുത്തുകാരി ഗ്രേസിക്ക് കൈമാറി പ്രകാശനം ചെയ്‌തു. 2019ലെ എൻ.ശിവശങ്കരപ്പിള്ള സംരംഭക അവാർഡ് കൊല്ലം കോർപ്പറേഷൻ മുൻ മേയർ വി. രാജേന്ദ്ര ബാബുവിന് സ്‌പീക്കർ നൽകി ആദരിച്ചു. നവോദയം ഗ്രന്ഥശാല പ്രസിഡന്‍റ്‌ കെ. വി ഭാസ്‌കരന്‍, സെക്രട്ടറി നാസർ, കെ.പി അപ്പന്‍റെ സഹധർമ്മിണി പ്രൊഫ. ഓമന തുടങ്ങിയവർ ചടങ്ങില്‍ പങ്കെടുത്തു.
Also Read: സമര തീവ്രത കുറച്ചു; അടിയന്തര ചികിത്സ ഡ്യൂട്ടിക്ക് കയറി പിജി ഡോക്‌ടര്‍മാര്‍
