കൊല്ലം: കൊട്ടാരക്കര കെഎസ്ആർടിസി ഡിപ്പോയിൽ നിന്നും ബസ് കാണാതായത് ആശങ്ക പരത്തി. ആർഎസി 354 എന്ന വേണാട് ഓർഡിനറി ബസാണ് ഇന്ന് രാവിലെ മുതൽ കാണാതായത്. തുടര്‍ന്ന് 11.30ഓടെ പാരിപ്പള്ളിയിൽ ഉപേക്ഷിച്ച നിലയിൽ ബസ് കണ്ടെത്തി. സംഭവത്തില്‍ കൊട്ടാരക്കര പൊലീസ് കേസെടുത്ത് അന്വേഷണം ആരംഭിച്ചു.
കൊട്ടാരക്കര മുനിസിപ്പാലിറ്റിക്ക് സമീപം ദേശീയപാതയിൽ പാര്‍ക്ക് ചെയ്‌തിരിക്കുകയായിരുന്നു ബസ്. ഇന്ന് രാവിലെ ബസ് എടുക്കാനായി ഡ്രൈവര്‍ എത്തിയപ്പോഴാണ് ബസ് മോഷ്ടിക്കപ്പെട്ടതായി മനസിലായത്. തുടര്‍ന്ന് കൊട്ടാരക്കര കെഎസ്ആർടിസി ഡിപ്പോ അധികൃതർ പൊലീസില്‍ പരാതി നൽകുകയായിരുന്നു. പൊലീസ് അന്വേഷണം തുടരുന്നതിനിടെയാണ് ബസ് പാരിപ്പള്ളിയിൽ ഉപേക്ഷിച്ച നിലയിൽ കണ്ടെത്തിയത്.
