കാസർകോട്: തെരുവുനായ്‌ക്കളുടെ ആക്രമണം രൂക്ഷമായതിനെ തുടർന്ന് മദ്രസ വിദ്യാർഥികളുടെ സംരക്ഷണത്തിനായി രക്ഷിതാവ് തോക്കെടുത്ത സംഭവത്തിൽ പൊലീസ് കേസെടുത്തു. നായ്ക്കളുടെ ഭീഷണി നേരിടാന്‍ തോക്കുമായി രംഗത്തെത്തിയ ബേക്കൽ സ്വദേശി സമീറെന്ന ടൈഗർ സമീറിനെതിരെയാണ് കേസ്. ഐപിസി 153 വകുപ്പ് പ്രകാരം സമൂഹത്തിൽ ലഹളയുണ്ടാക്കുന്ന തരത്തിൽ വീഡിയോ ചിത്രീകരിക്കുകയും പ്രചരിപ്പിക്കുകയും ചെയ്‌തുവെന്ന് ആരോപിച്ചാണ് ബേക്കൽ പൊലീസ് ശനിയാഴ്ച (സെപ്‌റ്റംബര്‍ 17) കേസെടുത്തത്.
MORE READ | പട്ടിയെ ഓടിക്കാന്‍ എയര്‍ ഗണ്ണുമായി കുട്ടികളോടൊപ്പം മാസ് നടത്തം; വൈറലായി സമീറും പിള്ളേരും
കാസർകോട് ബേക്കൽ ഹദാദ് നഗറില്‍ വ്യാഴാഴ്‌ചയായിരുന്നു (സെപ്‌റ്റംബര്‍ 15) സംഭവം. തെരുവുനായ ശല്യം രൂക്ഷമായതോടെ വിദ്യാർഥികൾക്ക് മുന്നിൽ തോക്കേന്തിക്കൊണ്ട് സമീര്‍ നടന്ന സാമൂഹ്യ മാധ്യമങ്ങളില്‍ വൈറലായിരുന്നു. തുടര്‍ന്ന് മാധ്യമങ്ങളും ഇക്കാര്യം വലിയ വാര്‍ത്തയാക്കിയിരുന്നു.
നായ ഓടിക്കാനെത്തിയാല്‍ തോക്കെടുത്ത് വെടിവച്ച് കൊല്ലുമെന്ന് ഇയാൾ വീഡിയോയിൽ പറയുന്നുണ്ടായിരുന്നു. സമീറിന്‍റെയും സമീപവാസികളുടെയും 13 നടുത്ത് വരുന്ന കുട്ടികള്‍ ഇയാള്‍ക്ക് പിന്നിൽ നടക്കുന്നതും വീഡിയോയിൽ വ്യക്തമായിരുന്നു. എന്നാൽ നായ്ക്കളെ കൊല്ലാൻ വേണ്ടി അല്ലെന്നും കുട്ടികളുടെ സുരക്ഷയാണ് ലക്ഷ്യമിട്ടതെന്നും കൈയില്‍ എയർ ഗണ്ണായിരുന്നെന്നും സമീർ പ്രതികരിച്ചു.
