കാസർകോട്: അധോലോക ഗുണ്ട സിയയുടെ കൂട്ടാളി നപ്പട്ട റഫീഖിനെതിരെ ഇന്‍റർപ്പോൾ റെഡ് കോർണർ നോട്ടീസ് പുറപ്പെടുവിച്ചു. ഉപ്പള കയ്യാറിലെ മുഹമ്മദ്‌ റഫീഖ് എന്ന നപ്പട്ട റഫീഖി(32)നെതിരെയാണ് കാസർകോട് പൊലീസിന്‍റെ അപേക്ഷ പ്രകാരം റെഡ്കോർണർ നോട്ടീസ് പുറപ്പെടുവിച്ചത്. കൊലപാതകം, തട്ടിക്കൊണ്ടുപോകൽ, മോഷണം, പിടിച്ചുപറി അടക്കം കേരളത്തിലും കർണാടകത്തിലും നിരവധി കേസുകളിൽ ഇയാൾ പ്രതിയാണ്.
നിലവിൽ ഇയാൾ ഗൾഫിൽ ഒളിവിൽ കഴിയുകയാണ്. അടുത്തിടെ മുംബൈ വിമാനത്താവളത്തിൽ വച്ച് അറസ്റ്റിലായ സിയയുടെ കൂട്ടാളിയാണ് നപ്പട്ട റഫീഖ്.
Red corner notice: റെഡ് കോർണർ നോട്ടീസ് പ്രകാരം ഏതു രാജ്യത്തെ പൊലീസിനും എവിടെ വെച്ചും ഇയാളെ അറസ്റ്റ് ചെയ്യാൻ കഴിയും. ഗുരുതരമായ കുറ്റകൃത്യങ്ങൾ നടത്തി വിദേശത്തേക്ക് രക്ഷപ്പെട്ട വിവിധ കേസുകളിൽ ഉൾപ്പെട്ട മറ്റു പ്രതികൾക്കെതിരെയും റെഡ്കോർണർ നോട്ടീസ് പുറപ്പെടുവിക്കാനുള്ള നടപടികൾ പുരോഗമിക്കുകയാണെന്ന് കാസർകോട് ഡിവൈഎസ്‌പി പി. ബാലകൃഷ്‌ണൻ നായർ അറിയിച്ചു.
