കാസർകോട്: സൈക്കിളില്‍ രാജ്യം ചുറ്റുന്നത് പുതിയ കാര്യമാണോ എന്ന് ചോദിച്ചാല്‍ പലതാകും ഉത്തരങ്ങൾ. പക്ഷേ ഇന്ധന വില വർധനയില്‍ പ്രതിഷേധിച്ച് രണ്ട് യുവാക്കൾ സൈക്കിളില്‍ രാജ്യം ചുറ്റാൻ തീരുമാനിച്ചാല്‍ അതൊരു പുതിയ കാര്യമാകും.
കൊച്ചിക്കാരൻ അഫ്‌സൽ ഹോട്ടൽ തൊഴിലാളിയാണ്. തിരൂരുകാരൻ അഫ്‌സല്‍ മൊബൈൽ ടെക്നീഷ്യനാണ്. മലപ്പുറം തിരൂരിൽ നിന്നും കൊച്ചി ആലുവയിൽ നിന്നാണ് സൈക്കിൾ സവാരിയുടെ തുടക്കം. രണ്ടിടങ്ങളിൽ നിന്നുള്ള യാത്രയുടെ ലക്ഷ്യം പക്ഷെ ഒന്നു തന്നെ. ആലുവക്കാരൻ അഫ്‌സൽ കേരളം ചുറ്റി തിരിച്ചു പോകാനായിരുന്നു ഉദ്ദേശിച്ചത്. എന്നാൽ സമാന ചിന്തയോടെ തിരൂരുകാരൻ സൈക്കിളിൽ മുന്നോട്ട് പോകുന്നതറിഞ്ഞതോടെ യാത്ര പിന്നെ ഒന്നിച്ചാകാമെന്നായി.
രാജ്യാന്തര വിപണിയിൽ ഇന്ധനവില കുറയുമ്പോഴും രാജ്യത്ത് അനുദിനം വില വർധിക്കുന്നതിനെതിരായാണ് ഇവർ സൈക്കിൾ പെഡൽ ചവിട്ടുന്നത്. ജീവിതം അടിച്ചുപൊളിക്കാൻ വേണ്ടി മാത്രമുള്ളതല്ലെന്ന തിരിച്ചറിവിൽ നിന്നാണ് സൈക്കിൾ സവാരിയിലൂടെ പ്രതിഷേധമെന്ന ആശയം ഉരുത്തിരിഞ്ഞത്. അങ്ങനെ രണ്ടിടങ്ങളിൽ നിന്നും എത്തിച്ചേർന്ന അഫ്‌സലുമാർ സുഹൃത്തുക്കളായി കശ്മീരിലേക്ക് സൈക്കിൾ ചവിട്ടുകയാണ്.
യാത്രക്കിടയിലെ ചിലവിനുള്ള പണം കണ്ടെത്താനായി മൊബൈൽ ഫോൺ വിറ്റു. ഒരു ദിവസം നൂറ് കിലോമീറ്റർ സഞ്ചരിച്ച് പതിയെ ലക്ഷ്യസ്ഥാനത്തെത്താനാണ് ഇവരുടെ പദ്ധതി.
