കണ്ണൂർ: കേരളത്തിൽ കലാപമുണ്ടാക്കാനാണ് ആർഎസ്എസ് ശ്രമിക്കുന്നതെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. കമ്മ്യൂണിസ്റ്റ് പാർട്ടിയുടെ നൂറാം വാർഷികാഘോഷത്തിന്റെ ഭാഗമായി ജില്ലാ സെമിനാർ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സ്വാതന്ത്ര്യ സമരത്തിൽ പങ്കെടുത്തതിന്റെ പേരിൽ മാപ്പ് എഴുതിക്കൊടുത്ത സവർക്കർക്ക് ഭാരതരത്നമാണ് കേന്ദ്ര സർക്കാർ കൊടുക്കാൻ പോകുന്നത്. ട്രംപും മോദിയും ഒരേ ആശയക്കാരാണെന്നും കമ്യൂണിസ്റ്റ് പാർട്ടി ഇന്ത്യയിൽ വലിയ വെല്ലുവിളി നേരിടുന്നുണ്ടെന്നും വാർഷികാഘോഷ വേളയിൽ അദ്ദേഹം പറഞ്ഞു.
തൊഴിലാളി വർഗത്തെ തകർക്കാൻ ജാതി, മതം, ഭാഷ എന്നിവ ഉപയോഗിക്കുന്നെന്നും മതത്തിന്റെ അടിസ്ഥാനത്തിൽ അംഗത്വം നൽകുന്ന രാജ്യമായി ഇന്ത്യയെ മാറ്റാൻ ശ്രമിക്കുന്നുവെന്നും സംസ്ഥാന സെക്രട്ടറി കോടിയേരി ബാലകൃഷ്ണൻ പറഞ്ഞു. സിപിഎം - സിപിഐ തുടങ്ങിയ പാർട്ടികളുടെ ഐക്യം ശക്തിപ്പെടുത്തേണ്ട കാലമാണിത്. കേരളത്തിലെ സർക്കാരിനെ തകർക്കാമെന്ന ആർഎസ്എസ് ദൗത്യത്തെ കോൺഗ്രസ് പിന്തുണക്കുന്നു. പുതിയ രീതിയിൽ പാർട്ടി പുനസംഘടിപ്പിക്കണമെന്നും കൂടുതൽ ആശയ പ്രചരണം നടത്തണമെന്നും കോടിയേരി ബാലകൃഷ്ണൻ കൂട്ടിച്ചേർത്തു.