കണ്ണൂർ: തലശ്ശേരി പാറാലിൽ നൂറ് ലിറ്റർ ഡീസലുമായി ഇതര സംസ്ഥാന തൊഴിലാളി പൊലീസ് പിടിയിൽ. തമിഴ്നാട് കൃഷ്ണഗിരി സ്വദേശി ദേവാരമാണ് ന്യൂ മാഹി പൊലീസിന്‍റെ പിടിയിലായത്. പാറാൽ അറബിക് കോളജിന് സമീപം പട്രോളിംങിനിടെ സംശയാസ്പദമായ സാഹചര്യത്തിൽ കാനുമായി നിൽക്കുന്ന ദേവാരത്തിനെ ന്യൂ മാഹി പൊലീസ് ചോദ്യം ചെയ്യുകയായിരുന്നു.
ബൈപ്പാസ് നിർമാണ സ്ഥലത്തെ ഹിറ്റാച്ചി ഡ്രൈവറായ ദേവാരം താൻ ഓടിക്കുന്ന വാഹനത്തിലുൾപ്പടെയുള്ള ഡീസൽ മോഷ്ടിച്ച് മറിച്ചു വിൽക്കുകയായിരുന്നുവെന്നും അഞ്ച് കാനുകളിലായി 100 ലിറ്റർ ഡീസലാണ് ഇയാളിൽ നിന്നും പിടിച്ചെടുത്തതെന്നും പൊലീസ് പറഞ്ഞു. ബൈപ്പാസ് നിർമാണ സ്ഥലത്തെ വാഹനങ്ങളിൽ നിന്ന് മുൻപും ഡീസൽ മോഷണം പോയിട്ടുണ്ടെന്ന് പൊലീസ് കൂട്ടിച്ചേർത്തു. കോടതിയിൽ ഹാജരാക്കിയ പ്രതിയെ കോടതി റിമാൻഡ് ചെയ്തു.
