കണ്ണൂർ: ദേശീയ വനിതാ ബോക്‌സിങ് ചാമ്പ്യൻഷിപ്പിൽ പാരമ്പര്യത്തിന്റെ കരുത്തുമായി ഹരിയാന താരം നൂപൂർ മത്സരിക്കാനിറങ്ങുന്നു. ഇന്ത്യൻ ബോക്‌സിങ്ങിന്‍റെ പിതാവും ഇതിഹാസവുമായ ഹവാ സിംഗിന്റെ കൊച്ചുമകൾ കൂടിയാണ് നൂപൂർ.
60 വർഷത്തെ ബോക്‌സിങ് പാരമ്പര്യവുമായാണ് നൂപൂർ റിങിലേക്ക് സ്വർണം ലക്ഷ്യമിട്ട് ഇറങ്ങുന്നത്. ഹവാ സിംഗിന്റെ മകനും മുൻ അന്തർദേശീയ താരവുമായ സഞ്ജയ് കുമാർ തന്നെയാണ് മകളെ പരിശീലിപ്പിക്കുന്നതും. 1993 ഏഷ്യൻ ഗെയിംസിലെ വെള്ളി മെഡൽ ജേതാവു കൂടിയാണ് സഞ്ജയ് കുമാർ. ഹവാ സിംഗ് സ്ഥാപിച്ച ഭിവാനി ബോക്‌സിങ് ക്ലബിന്റെ പരിശീലകനാണ് സഞ്ജയ് കുമാർ. സ്വന്തം മകൾ മികച്ച വിജയം നേടുമെന്നും പാരമ്പര്യം കാക്കുമെന്നും സഞ്ജയ് കുമാർ പറയുന്നു.
കേരളം മികച്ച വേദിയാണെന്നും മുത്തച്ഛനുള്ള സമ്മാനമായി സ്വർണ മെഡൽ നേടുമെന്നും, ഉറച്ച വിജയപ്രതീക്ഷയുണ്ടെന്നും നൂപൂർ ഇടിവി ഭാരതിനോട് പറഞ്ഞു.
ഈ വർഷം നടന്ന ഏഷ്യൻ ചാമ്പ്യൻഷിപ്പിൽ നൂപൂർ ക്വാർട്ടർ ഫൈനൽ വരെയെയെത്തിയിരുന്നു. 75 കിലോ വിഭാഗത്തിൽ മത്സരിക്കുന്ന ഈ ഇരുപതുകാരി ദേശീയ വനിതാ ബോക്‌സിങിൽ മിന്നും താരമാകാനുള്ള തയ്യാറെടുപ്പിലാണ്.
