കണ്ണൂർ: ഇളവയൂർ വാരത്ത് ഒറ്റക്ക് താമസിക്കുകയായിരുന്ന പി.കെ ആയിഷ എന്ന സ്ത്രീയെ മോഷണശ്രമത്തിനിടെ കൊലപ്പെടുത്തിയ കേസിലെ രണ്ടാം പ്രതിയെ അസമിൽ നിന്ന് പിടികൂടി. ഗോറിമാറ ബംഗാളിപ്പാറ വില്ലേജിലെ നസറുൽ ഇസ്ലാമിനെയാണ് ബംഗ്ലാദേശ് അതിർത്തിയിൽ ഒളിവിൽ കഴിയവെ കണ്ണൂർ പൊലീസ് പിടികൂടിയത്. നസറുൽ ഇസ്ലാമിനെ പൊലീസ് സംഘം കണ്ണൂരിലെത്തിച്ചു.
കേസിലെ ഒന്നാം പ്രതി മഹിബുൾ ഇസ്ലാം നേരത്തെ പിടിയിലായിരുന്നു. മഹിബുളിൽ നിന്നും ലഭിച്ച വിവരങ്ങളുടെ അടിസ്ഥാനത്തിലായിരുന്നു അന്വേഷണം. സിആർപിഎഫ് സംഘത്തിന്‍റെ സഹായത്തോടെയാണ് കണ്ണൂർ പൊലീസ് പ്രതിയെ പിടികൂടിയത്.
കഴിഞ്ഞ സെപ്റ്റംബർ 23നാണ് മോഷണത്തിനിടെ ആയിഷക്ക് ഗുരുതരമായി പരിക്കേറ്റത്. ചികിത്സയിലിരിക്കെ 29ന് മരിച്ചു.
ആയിഷ തനിച്ചാണ് താമസിക്കുന്നതെന്ന് മനസിലാക്കിയ പ്രതികള്‍ അകത്ത് വെള്ളം ലഭിക്കുന്നതിനുള്ള ടാപ്പ് അടച്ചു. വെള്ളത്തിനായി വീടിനു പുറത്തിറങ്ങിയപ്പോൾ പ്രതികള്‍ ആയിഷയെ ആക്രമിക്കുകയായിരുന്നു. ഇവരുടെ കാതിലുണ്ടായിരുന്ന ആഭരണങ്ങള്‍ മോഷണ സംഘം പറിച്ചെടുക്കുന്നതിനിടെ ഗുരുതരമായി പരിക്കേൽക്കുകയായിരുന്നു.
