കണ്ണൂർ: ചോര മണക്കുന്ന കഠാരയും വർഗ്ഗീയ വിഷവുമായി നിൽക്കുന്ന എസ്ഡിപിഐ മതേതര കേരളത്തിന് ആപത്തെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ. കേരളത്തെ ചോരക്കളമാക്കി രാഷ്ട്രീയ നേട്ടത്തിന് ശ്രമിക്കുന്ന ഈ വർഗ്ഗീയക്കൂട്ടത്തെ ഒറ്റപ്പെടുത്താൻ കേരള സമൂഹം ഒന്നിക്കണം. കൊലക്കത്തി കൊണ്ട് കോൺഗ്രസിനെ തളർത്താമെന്ന വ്യാമോഹം കേരളത്തിൽ നടപ്പില്ലെന്നും മുല്ലപ്പള്ളി പ്രസ്‌താവനയിൽ പറഞ്ഞു. ചാവക്കാട് പുന്നയിൽ കോൺഗ്രസ് ബൂത്ത്‌ പ്രസിഡന്റ് നൗഷാദിനെ അതിക്രൂരമായി കൊലപ്പെടുത്തുകയും കോൺഗ്രസ് പ്രവർത്തകരായ വിഭീഷ്, നിഷാദ്, സുരേഷ് എന്നിവരെ ക്രൂരമായി വെട്ടി പരിക്കേൽപ്പിക്കുകയും ചെയ്തത് എസ്ഡിപിഐ ആണെന്ന് വ്യക്തമായി കഴിഞ്ഞു. എന്നാൽ കോൺഗ്രസ് നേതാക്കൾ എസ്‌ഡിപിഐക്ക് എതിരെ പ്രതികരിക്കാതിരിക്കുന്നത് അവരുമായി ബന്ധമുളളത് കൊണ്ടാണെന്നാണ് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ ആരോപണം കൊടിയ കുറ്റബോധത്തിൽ നിന്നുളള ശുദ്ധ അസംബന്ധമാണ്. അഭിമന്യുവിനെ കുത്തി വീഴ്ത്തിയവർക്ക് കുട പിടിക്കുന്ന സിപിഎമ്മിനും സർക്കാരിനും ഇങ്ങനെയേ പ്രതികരിക്കാനാവൂ അവരെ കുറ്റം പറയാനാവില്ല. അഭിമന്യുവിന്റെ കൊലയാളികളെ പോലെ നൗഷാദിന്റെ കൊലയാളികളെയും സംരക്ഷിക്കാനാണ് സർക്കാർ തീരുമാനം എങ്കിൽ അതിശക്തമായ പ്രതിഷേധം കോൺഗ്രസിന്‍റെ ഭാഗത്ത് നിന്നും ഉണ്ടാകുമെന്നും മുല്ലപ്പള്ളി ഫേസ് ബുക്ക് പോസ്റ്റില്‍ കുറിച്ചു.
ഫേസ് ബുക്ക് പോസ്റ്റിന്‍റെ പൂർണരൂപം
ചോര മണക്കുന്ന കഠാരയും വർഗ്ഗീയ വിഷവുമായി നിൽക്കുന്ന എസ് ഡി പി ഐ മതേതര കേരളത്തിന് ആപത്ത്.
കേരളത്തെ ചോരക്കളമാക്കി രാഷ്ട്രീയ നേട്ടത്തിന് ശ്രമിക്കുന്ന ഈ വർഗ്ഗീയക്കൂട്ടത്തെ ഒറ്റപ്പെടുത്താൻ കേരള സമൂഹം ഒന്നിക്കണം. കൊലക്കത്തി കൊണ്ട് കോൺഗ്രസിനെ തളർത്താമെന്ന വ്യാമോഹം കേരളത്തിൽ നടപ്പില്ലെന്നും ഞാൻ ഓർമ്മിപ്പിക്കുന്നു.
ചാവക്കാട് പുന്നയിൽ കോൺഗ്രസ്സ്‌ ബൂത്ത്‌ പ്രസിഡന്റ് നൗഷാദിനെ അതിക്രൂരമായി കൊലപ്പെടുത്തുകയും കോൺഗ്രസ് പ്രവർത്തകരായ വിഭീഷ്, നിഷാദ്, സുരേഷ് എന്നിവരെ ക്രൂരമായി വെട്ടി പരിക്കേൽപ്പിക്കുകയും ചെയ്തത് എസ് ഡി പി ഐ ആണെന്ന് വ്യക്തമായി കഴിഞ്ഞു. ഈ വിഷയത്തിൽ ഇന്നു രാവിലെ തന്നെ മാധ്യമങ്ങൾ വഴി ശക്തമായ പ്രതിഷേധം അറിയിച്ചിരുന്നു.
ഇത് രാഷ്ട്രീയ കൊലപാതകം ആണെന്നും പ്രതികളെ എത്രയും വേഗം പിടികൂടണമെന്നും ആവശ്യപ്പെട്ടിരുന്നു.
സംഭവം അറിഞ്ഞ ഉടനെ തൃശ്ശൂർ ജില്ലാ കോൺഗ്രസ് കമ്മിറ്റിയുടെ ചുമതല വഹിക്കുന്ന ജോസ് വെള്ളുരിനെയും അതോടൊപ്പം ചാവക്കാട് മണ്ഡലം കോൺഗ്രസ് പ്രസിഡണ്ട് ഷാനവാസിനേയും ഞാൻ ബന്ധപെടുകയുണ്ടായി.
അതിനു ശേഷമാണ് കെപിസിസി ഓഫീസിൽ വെച്ച് കേരളത്തിലെ മുഴുവൻ മാധ്യമങ്ങളെയും ഞാൻ നേരിൽ കണ്ടത്. അതോടൊപ്പം ഏറ്റവും പ്രമുഖമായ മൂന്ന് ഇംഗ്ലീഷ് ചാനലും എന്‍റെ പ്രതികരണം അറിയാൻ എത്തിയിരുന്നു. എനിക്ക് കിട്ടിയ വിവരണങ്ങളുടെ അടിസ്ഥാനത്തിലാണ് ഉത്തരവാദപ്പെട്ട ഒരു പാർട്ടിയുടെ സംസ്ഥാന അധ്യക്ഷൻ എന്ന നിലയിൽ ഞാൻ ജാഗ്രതയോട് കൂടി പ്രതികരിച്ചത്.
മറ്റ് കേന്ദ്രങ്ങളിലും ഇത് സംബന്ധിച്ച് ഞാൻ നടത്തിയ അന്വേഷണത്തിൽ നിന്ന് വ്യക്തമായ സൂചന തരാൻ അവരാരും തയ്യാറായില്ല.
കേരളത്തിലെ ക്രമസമാധാന നില തകർന്നു എന്നും കേരളത്തിലെ ആഭ്യന്തര വകുപ്പ് നാഥനില്ലാ കളരി ആയെന്നും അക്രമം തടയുന്നതിൽ പൊലീസിന്‍റെ ഭാഗത്തെ ഗുരുതര വീഴ്ച അന്വേഷിക്കണമെന്നും ഞാൻ ആവശ്യപ്പെട്ടിരുന്നു.
പിന്നീടാണ് ജില്ലാ നേതൃത്വത്തിൽ നിന്നും പൊലീസിൽ നിന്നും പ്രതികളെ സംബന്ധിച്ച് വ്യക്തമായ വിവരം ലഭിച്ചത്. ഇതിനു ശേഷം കോൺഗ്രസിലെ മുതിർന്ന നേതാക്കൾ തന്നെ എസ് ഡി പി ഐ ക്ക് എതിരെ ശക്തമായ ഭാഷയിൽ പ്രതികരിച്ചു.
എന്നാൽ കോൺഗ്രസ് നേതാക്കൾ എസ് ഡി പി ഐക്ക് എതിരെ പ്രതികരിക്കാതിരിക്കുന്നത് അവരുമായി ബന്ധമുളളത് കൊണ്ടാണെന്നാണ് സി പി എം സംസ്ഥാന സെക്രട്ടറി കോടിയേരി ബാലകൃഷ്ണന്റെ ആരോപണം കൊടിയ കുറ്റബോധത്തിൽ നിന്നുളള ശുദ്ധ അസംബന്ധമാണ്.
തലശേരിയിൽ മത്സരിച്ച കാലം മുതൽ കോടിയേരിയും ഈ സംഘടനയുമായുളള ബന്ധം അറിയാത്തവരല്ല മലയാളികൾ. അഭിമന്യുവിനെ കുത്തി വീഴ്ത്തിയവർക്ക് കുട പിടിക്കുന്ന സി പി എമ്മിനും സർക്കാരിനും ഇങ്ങനെയേ പ്രതികരിക്കാനാവൂ അവരെ കുറ്റം പറയാനാവില്ല. എന്നും വർഗ്ഗീയ വിഷ പാമ്പുകൾക്ക് പാല് നൽകുന്ന പാരമ്പര്യമാണ് സി പി എമ്മിനുളളത്. വസ്തുത ഇതായിരിക്കെ കൈരളി ചാനൽ ഉപയോഗിച്ച് തങ്ങളുടെ എസ് ഡി പി ഐ ബന്ധം മറച്ചുവെക്കാൻ സിപിഎം നടത്തുന്ന ശ്രമം പാഴ് വേല മാത്രമാണ്.
അഭിമന്യുവിനെ രക്തസാക്ഷിയായി അവതരിപ്പിച്ച് കോടികൾ പിരിച്ച സി പി എം അഭ്യുമന്യുവിൻെറ കുടുംബത്തിന് നൽകിയത് നാമമാത്ര സഹായം മാത്രമാണ്. പിരിവിൽ കാട്ടിയ ശ്രദ്ധ കൊലയാളികളെ അറസ്റ്റു ചെയ്യാൻ കാട്ടിയിരുന്നെങ്കിൽ ഇന്ന് ഈ കൊലപാതകത്തിനുളള ധൈര്യം എസ് ഡി പി ഐക്ക് ഉണ്ടാകുമായിരുന്നില്ല.
അഭിമന്യുവിന്റെ പ്രതിപട്ടികയിൽ ഉളളവർക്ക് പിണറായി വിജയൻ സർക്കാർ നൽകിയ സംരക്ഷണവും സൗഭാഗ്യവും ഉറപ്പിച്ചാണ് ഇവർ കൊലക്കത്തിക്ക് മൂർച്ച കൂട്ടുന്നത്.
അഭിമന്യുവിന്റെ കൊലയാളികളെ പോലെ നൗഷാദിന്റെ കൊലയാളികളെയും സംരക്ഷിക്കാനാണ് സർക്കാർ തീരുമാനം എങ്കിൽ അതിശക്തമായ പ്രതിഷേധം കോണ്ഗ്രസ്സിന്റെ ഭാഗത്തു നിന്നും ഉണ്ടാകുമെന്നും ഞാൻ താകീത് നൽകുന്നു.
നൗഷാദിനെ കൊലപ്പെടുത്തുകയും സഹപ്രവർത്തകരെ വെട്ടി വീഴ്‌ത്തുകയും ചെയ്ത എസ് ഡി പി ഐകാരെ അടിയന്തിരമായി അറസ്റ്റ് ചെയ്ത് നിയമത്തിന്‍റെ മുന്നിൽ കൊണ്ടുവരാൻ സർക്കാർ തയാറാകണം. വെട്ടേറ്റ് ആശുപത്രിയിൽ കഴിയുന്ന പ്രവർത്തകരുടെ മൊഴി മാത്രം മതി കൊലയാളികളെ കണ്ടെത്താനും അവർക്കെതിരെ നടപടി സ്വീകരിക്കാനും.
ടിപി ചന്ദ്രശേഖരനെ നിഷ്ഠൂരമായി കൊലപ്പെടുത്തിയപ്പോഴും ശുഹൈബിനെ ക്രൂരമായി വധിച്ചപ്പോഴും പെരിയയിലെ രണ്ട് യുവ സുഹൃത്തുക്കളെ അരിഞ്ഞു തള്ളിയപ്പോഴും സിപിഎമ്മിന്റെ അക്രമ രാഷ്ട്രീയത്തെ ധീരമായി തുറന്നു കാട്ടിയ പാരമ്പര്യമാണ് എന്‍റെ രക്തത്തിലുള്ളത്.
എന്‍റെ മുൻപിൽ ആണത്വത്തോടെ വെല്ലുവിളി നടത്താൻ പാർട്ടി സെക്രട്ടറി കോടിയേരി ബാലകൃഷ്ണനേയും ആഭ്യന്തര വകുപ്പിന്‍റെ ചുമതലയുള്ള മുഖ്യമന്ത്രി പിണറായി വിജയനെയും ഞാൻ ക്ഷണിക്കുന്നു. പട്ടികൾ കുരച്ചാൽ സാർത്ഥകസംഘം മുന്നോട്ട് പോകില്ല എന്ന് രാഷ്ട്രീയ ഭീരുക്കൾ ധരിക്കരുത്.
