കണ്ണൂർ: കോർപറേഷൻ ഭരണം കഴിഞ്ഞ തവണ യുഡിഎഫിന് നഷ്ടമായത് സ്ഥാനാർഥി നിർണ്ണയത്തിലെ അപാകത കൊണ്ടാണെന്ന് തുറന്ന് സമ്മതിച്ച് കെ. സുധാകരൻ എംപി. ഒരു നിശ്ചയവുമില്ലാതെയാണ് യുഡിഎഫ് ജനവിധി തേടിയത്. അതിന്‍റെ ഫലം അനുഭവിച്ചു. ഈ തവണ അതെല്ലാം പരിഹരിച്ചു മുന്നോട്ട് പോവുകയാണെന്ന് കെ.പി.സി.സി വൈസ് പ്രസിഡന്‍റും എംപിയുമായ കെ. സുധാകരൻ ഇടിവി ഭാരതിനോട് പറഞ്ഞു. മുസ്ലിംലീഗിന് ഒരു സീറ്റ് അധികം നൽകിയാണ് കോൺഗ്രസ് നേതൃത്വം പ്രശ്നം പരിഹരിച്ചത്. ഉഭയകക്ഷി ചർച്ചയിൽ പ്രശ്നം പരിഹരിച്ചെന്നും അവർക്കുള്ളിലെ തർക്കം ലീഗ് നേതൃത്വം തന്നെ പരിഹരിക്കട്ടെയെന്നും സുധാകരൻ പറഞ്ഞു.
അതേ സമയം കോൺഗ്രസിൽ മേയർ സ്ഥാനാർഥി ആരെന്ന ചോദ്യത്തിന് ഇതുവരെയും ഉത്തരം കണ്ടെത്താൻ പാർട്ടിക്കായിട്ടില്ല. പി കെ രാഗേഷ് വിമതനായപ്പോൾ നേതൃനിരയിലേക്ക് കയറിവന്ന ടി ഒ മോഹനനാണ് മേയർ കസേര നോട്ടമിട്ടിരിക്കുന്നത്. എന്നാൽ പിന്നീട് സുധാകരനൊപ്പം ചേർന്ന പി കെ രാഗേഷും ഇതേ ചിന്തയിലാണ്. എന്നാൽ കെപിസിസി ജനറൽ സെക്രട്ടറി മാർട്ടിൻ ജോർജിനെ ജില്ലാ കോൺഗ്രസ് നേതൃത്വം രംഗത്ത് ഇറക്കിയതോടെ വടം വലി രൂക്ഷമാണ്. എല്ലാം രമ്യമായി പരിഹരിക്കുമെന്നാണ് കെ സുധാകരൻ എംപി പറയുന്നത്.
