കണ്ണൂർ: കഞ്ചാവ് കേസിലെ പ്രതിയെ പിടികൂടുന്നതിനിടെ പാപ്പിനിശേരിയിൽ എക്സൈസ് ഉദ്യോഗസ്ഥന് വെട്ടേറ്റു. പാപ്പിനിശേരി റെയ്ഞ്ച് സിവിൽ എക്സൈസ് ഉദ്യോഗസ്ഥൻ നിഷാദിനാണ് വെട്ടേറ്റത്. സംഭവത്തിൽ ചെറുകുന്ന് യോഗശാല സ്വദേശി ഷബീറിനെ പൊലീസ് കസ്റ്റഡിയിലെടുത്തു.
ഇളനീര്‍ കച്ചവടക്കാരനായ ഷബീര്‍ വിദ്യാര്‍ഥികള്‍ ഉള്‍പ്പെടെയുള്ളവര്‍ക്ക് കഞ്ചാവ് വില്‍ക്കുന്നുണ്ടെന്ന രഹസ്യ വിവരത്തെ തുടര്‍ന്നാണ് എക്സൈസ് സംഘം സ്ഥലത്തെത്തിയത്. മഫ്തിയിലെത്തിയ എക്സൈസ് സംഘം പരിശോധന നടത്താന്‍ ശ്രമിക്കവേ ഷബീര്‍ ഇവരെ ആക്രമിക്കുകയായിരുന്നു. കാലിന് വെട്ടേറ്റ നിഷാദിനെ കണ്ണൂരിലെ ആശുപത്രിയിലേക്ക് മാറ്റി.
