ഇടുക്കി: പൂപ്പാറ ഗവ. കോളജിലെ ചോദ്യപേപ്പര്‍ ചോർന്ന സംഭവത്തില്‍ യൂത്ത് കോണ്‍ഗ്രസും സമര രംഗത്ത്. യൂത്ത് കോണ്‍ഗ്രസ് ശാന്തമ്പാറ മണ്ഡലം കമ്മറ്റിയുടെ നേതൃത്വത്തില്‍ പൂപ്പാറ കോളജിലേക്ക് മാര്‍ച്ചും ധര്‍ണ്ണയും സംഘടിപ്പിച്ചു.
പൂപ്പാറ ഗവ. കോളജ് ചോദ്യപേപ്പര്‍ ചോർച്ച; യൂത്ത് കോണ്‍ഗ്രസും സമര രംഗത്ത് ഈ മാസം ഇരുപത്തി മൂന്നാം തീയതി നടന്ന ഇംഗ്ലീഷ് ബിരുദം രണ്ടാം സെമസ്റ്റിറിന്‍റെ ചോദ്യപേപ്പർ ചോർന്നെന്ന ആരോപണത്തെ തുടർന്ന് വകുപ്പ് തല അന്വേഷണം നടത്തണമെന്ന് ആവശ്യപ്പെട്ടുകൊണ്ടായിരുന്നു യൂത്ത് കോൺഗ്രസ് ഇന്ന് മാർച്ച് സംഘടിപ്പിച്ചത്. പ്രതിഷേധവുമായെത്തിയ പ്രവർത്തകരെ കോളജ് കവാടത്തില്‍ പൊലീസ് തടഞ്ഞു. കോളജിലേക്ക് തള്ളിക്കയറാന്‍ ഇവർ ശ്രമിച്ചതോടെ നേരിയ സംഘര്‍ഷവുമുണ്ടായി. ഡിസിസി ജനറൽ സെക്രട്ടറി അഡ്വ. സേനാപതി വേണു ധര്‍ണ്ണ ഉദ്ഘാടനം ചെയ്തു. കെഎസ്‌യു സംസ്ഥാന ജനറല്‍ സെക്രട്ടറി ജോബി ചെമ്മല, യൂത്ത് കോണ്‍ഗ്രസ് നിയോജക മണ്ഡലം പ്രസിഡന്റ് കെ. എസ്. അരുണ്‍, കെ. കെ. മോഹനന്‍, ബിജു വട്ടമറ്റം എന്നിവരും മാർച്ചിൽ പങ്കെടുത്തു.
