ഇടുക്കി : ആനയിറങ്കൽ ഹൈഡൽ പാർക്കിന് സമീപത്തെ നാലേക്കർ ഭൂമി അമ്യൂസ്മെന്റ് പാർക്ക് നിർമാണത്തിന് വിട്ടുനൽകിയ വൈദ്യുതി വകുപ്പ് നടപടി വിവാദമാകുന്നു. പെരുമ്പാവൂർ ആസ്ഥാനമായ സൊസൈറ്റിക്കാണ് അണക്കെട്ടിനോട് ചേർന്നുള്ള സ്ഥലം വിട്ടുനല്‍കിയത്.
പട്ടയ ഭൂമിയിൽ നിർമാണപ്രവർത്തനങ്ങൾക്ക് നിരോധനം നിലവിലുള്ളപ്പോഴാണ് അതീവ സുരക്ഷാമേഖലയിൽ പാര്‍ക്ക് നിര്‍മാണം. കുന്നിടിച്ചുള്ള നിർമാണപ്രവർത്തനം അശാസ്ത്രീയവും അനധികൃതവുമാണെന്ന ആരോപണവുമായി പ്രതിപക്ഷ രാഷ്ട്രീയ കക്ഷികൾ രംഗത്തെത്തിയിട്ടുണ്ട്. അണക്കെട്ടിന്‍റെ വൃഷ്ടിപ്രദേശത്ത് വൈദ്യുതി ബോർഡിന്‍റെ ഉടമസ്ഥതയിലുള്ള സ്ഥലത്താണ് നിര്‍മാണം.
കരാര്‍ രണ്ട് വര്‍ഷം മുന്‍പ്
രണ്ടുവർഷം മുൻപാണ് വരുമാനം പങ്കിടൽ കരാറനുസരിച്ച് വൈദ്യുതി വകുപ്പ് ഭൂമി സൊസൈറ്റിക്ക് പാട്ടത്തിന് നൽകിയത്. മൾട്ടി ഡയമെൻഷൻ തിയറ്റർ ആൻഡ് ഹൊറർ ഹൗസ് എന്ന പദ്ധതിക്കാണ് ഭൂമി നൽകിയിട്ടുള്ളത്. പദ്ധതിയിൽ നിന്നുള്ള വരുമാനത്തിന് 78% സൊസൈറ്റിക്കും, 22% വരുമാനം ഹൈഡൽ ടൂറിസം സെന്‍ററിനുമാണെന്നാണ് കരാർ.
Also Read :- ആനയിറങ്കൽ അണക്കെട്ട് തുറന്നു
മാട്ടുപ്പെട്ടി മൂന്നാർ ഹൈഡൽ പാർക്ക് എന്നിവ കഴിഞ്ഞാൽ ജില്ലയിൽ ഏറ്റവുമധികം പ്രതിദിന വരുമാനം ഉണ്ടായിരുന്ന ഹൈഡൽ ടൂറിസം സെന്ററാണ് ആനയിറങ്കല്‍. ഇത് നിലനില്‍ക്കെ പുതിയ പദ്ധതിക്ക് വേണ്ടി കുന്നിടിച്ച് നിരത്തുന്നതിലും എതിർപ്പ് ശക്തമാണ്.
അഴിമതിക്ക് കളമൊരുക്കാനെന്ന് ആരോപണം
അതേസമയം ലാഭത്തിൽ പ്രവർത്തിക്കുന്ന ഹൈഡൽ ടൂറിസം സെന്‍ററുകളില്‍ സി.പി.എം നേതാക്കളും ഹൈഡൽ ടൂറിസം വിഭാഗത്തിലെ മുൻ ഉദ്യോഗസ്ഥരും നേതൃത്വം നൽകുന്ന സഹകരണ സ്ഥാപനങ്ങൾക്ക് പുതിയ പദ്ധതികൾ ആരംഭിക്കുന്നതിന് അവസരം നൽകുന്നത് അഴിമതിക്ക് കളമൊരുക്കാനാണെന്ന ആരോപണവും ശക്തമാണ്.
പദ്ധതിയുമായി ബന്ധപ്പെട്ട ഹൈഡൽ ടൂറിസം വിഭാഗം വിവരാവകാശ നിയമപ്രകാരം രേഖകൾ നൽകാൻ തയ്യാറല്ലെന്ന് പൊതുപ്രവർത്തകൻ രഘുനാഥ് കണ്ണാറ പറയുന്നു. സർക്കാരിന്‍റെ ധനസഹായത്തോടെ അല്ലാതെ പ്രവർത്തിക്കുന്ന ഹൈഡൽ ടൂറിസം വിഭാഗം വിവരാവകാശ നിയമ പരിധിക്ക് പുറത്താണെന്നാണ് അപേക്ഷ നൽകിയവർക്ക് ലഭിച്ച മറുപടി.
Also Read :- ഇടുക്കി ആനയിറങ്കൽ ജലാശയത്തില്‍ മാലിന്യം തള്ളുന്നു
2019 ൽ പൊന്മുടി അണക്കെട്ടിനോട് ചേർന്ന് 21 ഏക്കർ ഭൂമി രാജാക്കാട് സർവീസ് സഹകരണ ബാങ്കിന് 15 വർഷത്തേക്ക് പാട്ടത്തിന് നൽകിയിരുന്നു. രാജാക്കാട് സർവീസ് സഹകരണ ബാങ്ക് ഇവിടെ അമ്യൂസ്മെന്റ് പാർക്ക് നിർമിച്ചത് വരുമാനം പങ്കിടൽ കരാറനുസരിച്ചാണ്.
ആനയിറങ്കൽ അണക്കെട്ടിന് സമീപമുള്ള ഭൂമി പെരുമ്പാവൂർ ആസ്ഥാനമായി പ്രവർത്തിക്കുന്ന സൊസൈറ്റിക്ക് നൽകിയത് മാനദണ്ഡങ്ങൾ പാലിച്ചാണ് എന്നും ടെൻഡർ നടപടികൾ സുതാര്യമാണെന്നും വൈദ്യുതി ബോർഡ് അധികൃതർ വ്യക്തമാക്കുന്നു.
