വട്ടവടയിൽ കാട്ടാന ആക്രമണത്തിൽ വൻ കൃഷിനാശം

കൃഷിക്ക് കാവൽ കിടന്ന കർഷകനായ വെങ്കിടേഷ് രക്ഷപ്പെട്ടത് തലനാരിഴക്ക്

ഇടുക്കി: വട്ടവടയിൽ കാട്ടാന ആക്രമണത്തിൽ വൻ കൃഷിനാശം. കൃഷിക്ക് കാവൽ കിടന്ന കർഷകനായ വെങ്കിടേഷ് രക്ഷപ്പെട്ടത് തലനാരിഴക്ക്. കാട്ടാന അടിച്ച് തകർത്ത ഷെഡിൽ ഒരു രാത്രി മുഴുവൻ ഇയാൾ അബോധാവസ്ഥയിൽ കിടന്നു.
വട്ടവട പച്ചക്കറിത്തോട്ടത്തിൽ രാത്രി ഇറങ്ങിയ കാട്ടാനകൂട്ടം വ്യാപക നാശമാണ് വിതച്ചത്. ഏക്കറ് കണക്കിന് കൃഷി നശിപ്പിച്ചു. കൃഷിയിടത്തിലെ ഷെഡും കാട്ടാന കൂട്ടം തകർത്തു. ഷെഡിൽ ഉറങ്ങിക്കിടന്നിരുന്ന വെങ്കിടേഷ് കാട്ടനയെ കണ്ട് ഭയന്ന് അബോധാവസ്ഥയിലായി. രാവിലെയായിട്ടും വെങ്കിടേഷിനെ കാണാത്തതിനെ തുടർന്ന് അന്വേഷിച്ചെത്തിയപ്പോഴാണ് അബോധാവസ്ഥയിൽ കിടക്കുന്നത് കണ്ടത്. പരിക്കുകളൊന്നും പറ്റിയില്ലെങ്കിലും മരണം മുന്നിൽ കണ്ട നിമിഷങ്ങളായിരുന്നെന്ന് വെങ്കിടേഷ് പറയുന്നു.

മൂന്നേക്കർ സ്ഥലത്തെ ക്യാരറ്റ്, കാബേജ്, ബീട്രൂട്ട് തുടങ്ങിയ കൃഷികൾ പൂർണമായും നശിപ്പിച്ചു. ലക്ഷക്കണക്കിന് രൂപയുടെ നഷ്ടമാണുണ്ടായത്. വനം വകുപ്പ് അധികൃതരെത്തി ആനയെ കാടുകയറ്റുന്നതിനുള്ള നടപടി സ്വീകരിച്ചു. എന്നാൽ കർഷകർക്ക് നഷ്ടപരിഹാരം വേഗത്തിലാക്കുന്നതിനും ശാശ്വതമായ കാട്ടാന പ്രതിരോധം നടപ്പാക്കുന്നതിനും നടപടികൾ സ്വീകരിക്കണമെന്നാണ് കർഷകരുടെ ആവശ്യം.