ഇടുക്കിയിൽ ബൈക്കിടിച്ച് ഒരാൾ മരിച്ചു

റോഡ് മുറിച്ചു കടക്കുന്നതിനിടയിൽ രാജാക്കാട് ഭാഗത്ത് നിന്നും എത്തിയ ഇരുചക്ര വാഹനം ഇടിച്ചാണ് ആലപ്പുഴ തുമ്പോളി സ്വദേശി എം.കെ മാത്യു മരിച്ചത്.

ഇടുക്കി: രാജകുമാരിയിൽ വാഹനാപകടത്തിൽ ഒരാൾ മരിച്ചു. ആലപ്പുഴ തുമ്പോളി സ്വദേശി നാടുവിലാംപറമ്പിൽ എം.ജെ മാത്യു(51) ആണ് മരിച്ചത്. രാജകുമാരി സെൻട്രൽ ജംഗ്‌ഷനിൽ റോഡ് മുറിച്ചു കടക്കുന്നതിനിടയിൽ രാജാക്കാട് ഭാഗത്ത് നിന്നും എത്തിയ ഇരുചക്ര വാഹനം ഇയാളെ ഇടിച്ചു തെറിപ്പിക്കുകയായിരുന്നു. രാവിലെ എട്ടേകാലോടെയാണ് അപകടം നടന്നത്.

ഇടിയുടെ ആഘാതത്തിൽ തെറിച്ചു വീണ മാത്യുവിനെ ഗുരുതര പരിക്കുകളോടെ എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും രക്ഷിക്കാനായില്ല. ഇരുചക്രവാഹനത്തിൽ സഞ്ചരിച്ചിരുന്ന യുവാക്കളെ പരിക്കുകളോടെ കോലഞ്ചേരി ആശുപത്രിയിൽ പ്രവേശിപ്പിച്ചു. ഇരുവരും അങ്കമാലി സ്വദേശികളാണ്. രാജാക്കാട് പൊലീസ് മേൽനടപടികൾ സ്വീകരിച്ചു.