ഇടുക്കി: ആവശ്യത്തിന് ജീവനക്കാരില്ലാതായതോടെ രാജാക്കാട് സിഎച്ച്സിയുടെ പ്രവര്‍ത്തനം താളം തെറ്റി. ദിവസവും നൂറ്‌ കണക്കിന് രോഗികളാണ് ഇവിടെയെത്തുന്നത്. നാഷണല്‍ ഹെല്‍ത്ത് മിഷന്‍റെതടക്കം മൂന്ന് ഡോക്‌ടര്‍മാരുടെ സേവനം ലഭിച്ചിരുന്ന ആരോഗ്യ കേന്ദ്രത്തില്‍ കഴിഞ്ഞ ബുധനാഴ്‌ച ഒരു ഡോക്‌ടറുടെ സേവനം മാത്രമാണുണ്ടായിരുന്നത്.
കുട്ടികള്‍ക്കുള്ള പ്രതിരോധ കുത്തിവയ്‌പ്പുകള്‍ എടുക്കുന്ന സമയത്താണ് ജീവനക്കാരില്ലാത്തതില്‍ സിഎച്ച്സിയുടെ പ്രവര്‍ത്തനം കൂടുതല്‍ പ്രതിസന്ധിയിലാകുന്നത്. രണ്ടാഴ്‌ച മുമ്പ് നിലവിലുണ്ടായിരുന്ന മെഡിക്കല്‍ ഓഫിസര്‍ ഇടുക്കി മെഡിക്കൽ കോളജിലേക്ക് സ്ഥലം മാറി പോയി. ഇതോടെ കൊന്നത്തടി മെഡിക്കൽ ഓഫിസർക്ക് സിഎച്ച്സിയുടെ ചാര്‍ജ് നല്‍കുകയായിരുന്നു.
എന്നാല്‍ എല്ലാ ദിവസവും സിഎച്ച്സിയിലെത്താന്‍ മെഡിക്കല്‍ ഓഫിസര്‍ക്ക് സാധിക്കാത്തത് പ്രതിസന്ധി സൃഷ്‌ടിക്കുന്നുണ്ട്. 2019ല്‍ സിഎച്ച്‌സിയിലേക്ക് ആവശ്യമായ സ്റ്റാഫുകളെ ഉടന്‍ നിയമിക്കണമെന്ന് കാണിച്ച് രാജാക്കാട് വികസന കൂട്ടായ്‌മ ആരോഗ്യമന്ത്രിക്ക് കത്ത് നല്‍കിയിരുന്നു. എത്രയും വേഗത്തില്‍ പ്രശ്‌നത്തിന് പരിഹാരം കാണാമെന്ന മന്ത്രിയുടെ ഉറപ്പ് പാഴായി.
ആശുപത്രിയില്‍ ആവശ്യമായ ജീവനക്കാരെ നിയമിക്കണമെന്നാണ് നാട്ടുകാരുടെ ആവശ്യം. മാത്രമല്ല സിഎച്ച്സിയില്‍ മുമ്പുണ്ടായിരുന്ന കിടത്തി ചികിത്സ പുനഃരാരംഭിക്കണമെന്നും അല്ലാത്ത പക്ഷം വികസന കൂട്ടായ്‌മയുടെ നേതൃത്വത്തില്‍ പ്രതിഷേധം നടത്തുമെന്നും പ്രദേശവാസികള്‍ പറഞ്ഞു.
