ഇടുക്കി: മുത്തലാഖ് നിരോധന നിയമ പ്രകാരം അനുകൂല വിധി നേടി ഭര്‍ത്തൃവീട്ടിൽ കഴിയുകയായിരുന്ന വീട്ടമ്മയ്ക്ക് നേരെ ഭര്‍ത്താവിന്‍റെ ആക്രമണം. മാരകമായി പരിക്കേറ്റ കൊന്നത്തടി സ്വദേശി ഖദീജയെ കോതമംഗലത്തെ സ്വകാര്യ ആശുപത്രിയില്‍ തീവ്രപരിചരണ വിഭാഗത്തിൽ പ്രവേശിപ്പിച്ചു.
ഭര്‍ത്താവ് പരീത് ഒളിവിലാണെന്ന് പൊലീസ് അറിയിച്ചു. ചൊവ്വാഴ്ച ഉച്ചയ്ക്കാണ് ഖദീജയെ ഇരുമ്പ് വടികൊണ്ട് പരീത് ക്രൂരമായി ആക്രമിച്ചത്. തലയ്ക്കും കണ്ണിനും സാരമായി പരിക്കേറ്റിട്ടുണ്ട്.
തലാഖ് ചൊല്ലി ബന്ധം വേര്‍പ്പെടുത്തിയതിനെതിരെ ഇക്കഴിഞ്ഞ ജൂലൈയിലാണ് മുത്തലാഖ് നിരോധന നിയമപ്രകാരം ഖദീജ കോടതിയിൽ നിന്ന് അനുകൂല വിധി നേടിയത്. തുടര്‍ന്ന് ഇരുവര്‍ക്കും അവകാശപ്പെട്ട വീട്ടിൽ താമസിക്കാന്‍ കോടതി അനുവദിച്ചു.
Also Read:- കൊലയ്‌ക്കൊഴികെ പരമാവധി ശിക്ഷ ലഭിച്ചു, വിധി തൃപ്‌തികരമെന്ന് അന്വേഷണ ഉദ്യോഗസ്ഥന്‍
കോടതി ഉത്തരവ് നിലനിൽക്കെ ഖദീജ ഇറങ്ങിപ്പോകണമെന്നാവശ്യപ്പെട്ട് പരീത് നിരന്തരം ഭീഷണപ്പെടുത്തുമായിരുന്നു. ഇതിനെതിരെ കലക്ടര്‍ക്കും പൊലീസിനും ഖദീജ പരാതി നൽകിയതോടെ ആക്രമിക്കുകയായിരുന്നു. അന്വേഷണം ആരംഭിച്ചതായും പരീതിനെ കണ്ടെത്താന്‍ കഴിഞ്ഞില്ലെന്നും പൊലീസ് പറഞ്ഞു.
എന്നാൽ പരീതുമായി പൊലീസ് ഒത്തുകളിക്കുകയാണെന്ന ആരോപണവും ഖദീജയുടെ മകൻ ഉന്നയിച്ചു. അമ്മയ്ക്ക് ഭീഷണിയുണ്ടെന്ന് പലകുറി പറഞ്ഞിട്ടും പൊലീസ് തിരിഞ്ഞുനോക്കിയില്ലെന്നും ഇയാള്‍ കൂട്ടിച്ചേര്‍ത്തു.
