ഇടുക്കി: സഞ്ചാരികളുടെ ഇഷ്ടകേന്ദ്രമായി മാറുമ്പോഴും ഇടുക്കി കള്ളിമാലി ടൂറിസം കേന്ദ്രത്തില്‍ അടിസ്ഥാന സൗകര്യവും സുരക്ഷാ സംവിധാനങ്ങളും ഏര്‍പ്പെടുത്താന്‍ അധികൃതര്‍ തയ്യാറാകുന്നില്ലെന്ന് പരാതി. ഡിടിപിസിയുടെ അനാസ്ഥയില്‍ കള്ളിമാലിക്ക് നഷ്ടമായത് കോടികളുടെ വികസനപദ്ധതിയാണ്. ജില്ലയിലെ ഏറ്റവും കൂടുതല്‍ സഞ്ചാരികളെത്തുന്ന പ്രധാന വിനോദ സഞ്ചാര കേന്ദ്രങ്ങളിലൊന്നാണ് കള്ളിമാലി വ്യൂ പോയിന്‍റ്.
സഞ്ചാരികളുടെ ഇഷ്ടകേന്ദ്രമായ കള്ളിമാലിയില്‍ സൗകര്യങ്ങൾ ഒരുക്കാതെ അധികൃതർ കഴിഞ്ഞ യു ഡി എഫ് സർക്കാർ അമ്പത് ലക്ഷത്തോളം രൂപ വികസന പദ്ധതികള്‍ക്കായി അനുവദിച്ചിരുന്നു. ഡിടിപിസി ടെന്‍റര്‍ നടപടികള്‍ പൂര്‍ത്തീകരിച്ച് സിഡ്‌കോയ്ക്ക് ഒരുവര്‍ഷ കാലാവധിയില്‍ പന്ത്രണ്ടര ലക്ഷം രൂപ കൈമാറുകയും ചെയ്തു. എന്നാല്‍ കരാര്‍ കാലാവധി കഴിഞ്ഞിട്ടും നിര്‍മ്മാണ പ്രവര്‍ത്തനങ്ങള്‍ ആരംഭിച്ചിട്ടില്ല. ബ്ലോക്ക് പഞ്ചായത്തിന്റെ ഫണ്ടുപയോഗിച്ച് നിർമിച്ച കംഫര്‍ട്ട് സ്റ്റേഷന്‍ സഞ്ചാരികള്‍ക്കായി തുറന്നു നല്‍കാനും അധികൃതര്‍ തയ്യാറാകുന്നില്ല. പൊന്മുടിയില്‍ ടൂറിസം പദ്ധതി പുനരാരംഭിച്ചതോടെ രാജാക്കാട് മേഖലയിലേയ്ക്ക് സഞ്ചാരികള്‍ എത്തുന്നത് വര്‍ധിച്ചിട്ടുണ്ട്. ഈ സാഹചര്യത്തില്‍ കള്ളിമാലിയില്‍ അടിസ്ഥാന സൗകര്യങ്ങളും സുരക്ഷാ സംവിധാനങ്ങളും ഒരുക്കുന്നതിന് അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
