ദേവികുളം സബ് കളക്ടര്‍ രേണു രാജിനെതിരെ നടത്തിയ പരാമര്‍ശങ്ങളില്‍ ഖേദം പ്രകടിപ്പിച്ച് എസ്. രാജേന്ദ്രന്‍ എംഎല്‍എ. തന്റെ പരാമര്‍ശങ്ങള്‍ സബ് കളക്ടറെ വേദനിപ്പിച്ചുവെങ്കില്‍ ഖേദം പ്രകടിപ്പിക്കുന്നു. ബഹുമാനക്കുറവ് കൊണ്ടല്ല അവൾ എന്നു വിളിച്ചത്. ഭാര്യയെയും മകളെയും അവൾ എന്നു വിളിക്കാറുണ്ടെന്നും അത് സബ് കളക്ടറെ വേദനിപ്പിച്ചെങ്കില്‍ ഖേദം പ്രകടിപ്പിക്കുന്നെന്നും എംഎല്‍എ മാധ്യമങ്ങളോട് പറഞ്ഞു.
മൂന്നാര്‍ പഞ്ചായത്ത് ഷോപ്പിങ് കോംപ്ലക്സിന്റെ നിര്‍മാണം തടയാനെത്തിയ റവന്യൂ സംഘത്തെ എസ്. രാജേന്ദ്രന്‍ എംഎല്‍എ തടഞ്ഞതും, സബ് കളക്ടര്‍ക്കെതിരെ മോശം പരാമര്‍ശം നടത്തിയതുമാണ് വിവാദത്തിന് കാരണമായത്. കെട്ടിടനിര്‍മാണത്തിന് സ്റ്റോപ്പ് മെമ്മോ നല്‍കിയ സബ് കളക്ടര്‍ രേണു രാജിന് ബുദ്ധിയില്ലെന്നും എംഎല്‍എ അധിക്ഷേപിച്ചു. ഇത് വിവാദമായ പശ്ചാത്തലത്തിൽ എംഎൽഎയോട് വിശദീകരണം തേടുമെന്ന് സിപിഎം അറിയിച്ചിരുന്നു.
എന്നാല്‍ മൂന്നാറിലെ കെട്ടിട നിര്‍മാണവുമായി ബന്ധപ്പെട്ട് തന്റെ നിലപാടുകളില്‍ മാറ്റമില്ലെന്നും നിര്‍മാണം തടയാന്‍ ഉദ്യോഗസ്ഥരെത്തിയാല്‍ എതിര്‍ക്കുമെന്നും എസ്. രാജേന്ദ്രന്‍ പറഞ്ഞു. എംഎല്‍എ റവന്യൂ വകുപ്പിന്റെ നടപടി തടസ്സപ്പെടുത്തിയത് ചൂണ്ടിക്കാട്ടി നാളെ സബ്കളക്ടര്‍ കോടതിയില്‍ സത്യവാങ്മൂലം നല്‍കാനിരിക്കെയാണ് എംഎല്‍എയുടെ ഖേദപ്രകടനം. അനധികൃത നിര്‍മാണം തടഞ്ഞതുമായി ബന്ധപ്പെട്ട സംഭവവികാസങ്ങളുടെ പശ്ചാത്തലത്തിലാണ് സബ് കളക്ടര്‍ നാളെ ഹൈക്കോടതിയില്‍ സത്യവാങ്മൂലം നല്‍കുന്നത്.
