എറണാകുളം: കാറ്റിലും മഴയിലും ആയിരക്കണക്കിന് വാഴകൾ നശിച്ച കോതമംഗലത്തെ കീരംപാറ പഞ്ചായത്തിൽ കൃഷിവകുപ്പ് ഉദ്യോഗസ്ഥർ സന്ദർശനം നടത്തി. നഷ്‌പരിഹാരം ഉടനെ ലഭ്യമാക്കുന്നതിനുള്ള നടപടിക്രമങ്ങൾ പൂർത്തിയാക്കിയതായി കീരംപാറ കൃഷി ഓഫീസർ അഞ്ജു പറഞ്ഞു. എല്ലാ കർഷകരും വിള ഇൻഷുർ ചെയ്യണമെന്നും പ്രകൃതിക്ഷോഭങ്ങൾ അടിക്കടി ഉണ്ടാകുന്നതിനാൽ ജാഗ്രത പാലിക്കണമെന്നും കൃഷി അസിസ്റ്റന്‍റ് ഡയറക്ടർ വി.പി സിന്ധു പറഞ്ഞു.
കോതമംഗലത്തെ കീരംപാറയിൽ കാറ്റിലും മഴയിലും വ്യാപക കൃഷി നാശം
കീരംപാറ പഞ്ചായത്തിലെ പാലമറ്റത്തിന് സമീപം ആറ് കർഷകർ ചേർന്ന് പാട്ടത്തിനെടുത്ത പത്ത് ഏക്കർ സ്ഥലത്തെ വാഴകളാണ് കാറ്റത്ത് നശിച്ചത്. നാലായിരത്തോളം വാഴകൾ കാറ്റത്ത് ഒടിഞ്ഞു വീണു. കഴിഞ്ഞ വെള്ളപ്പൊക്കത്തില്‍ വൻതോതിൽ കൃഷി നാശം സംഭവിച്ച പ്രദേശങ്ങളാണിത്. ഇത്തവണ ഇൻഷുർ ചെയ്തതിനാൽ നഷ്ടത്തിന്റെ തോത് കുറയ്ക്കാനാകും എന്നത് കർഷകർക്ക് നേരിയ ആശ്വാസം നല്‍കും.
