എറണാകുളം: ടിആർഎസ്‌ എംഎൽഎമാരെ കൂറുമാറ്റാൻ പണം നൽകിയെന്ന കേസിൽ കൊച്ചിയിലെ അന്വേഷണത്തിന് തെലങ്കാന പൊലീസ് സഹായം തേടിയതായി കൊച്ചി സിറ്റി പൊലീസ് കമ്മിഷണർ സിഎച്ച് നാഗരാജു. തെലങ്കാന പൊലീസിന് ആവശ്യമായ സഹായം നൽകും. സാധാരണ രീതീയിൽ മറ്റു സംസ്ഥാനങ്ങളിലെ പൊലീസ് സഹായം തേടിയാൽ അവർക്ക് ആവശ്യമായ സഹായം ചെയ്‌ത് നൽകാറുണ്ട്.
തെലങ്കാന പൊലീസ് അന്വേഷിച്ച കേസുമായി ബന്ധപ്പെട്ട് പ്രതികരിക്കാനില്ലന്നും സി.എച്ച് നാഗരാജു പറഞ്ഞു. തുഷാർ വെള്ളാപ്പള്ളി ആരോപണ വിധേയനായ ടിആർഎസ്‌ എംഎൽഎമാരെ കൂറുമാറ്റാൻ ശ്രമിച്ച കേസിലാണ് കൊച്ചിയിലും അന്വേഷണം നടക്കുന്നത്. കേസ് അന്വേഷിക്കുന്ന പ്രത്യേക അന്വേഷണ സംഘം കഴിഞ്ഞ ദിവസം കൊച്ചിയിലെത്തിയിരുന്നു.
ഇതേ കേസിൽ അറസ്റ്റിലായ രാമചന്ദ്ര ഭാരതിയുടെ സുഹൃത്തായ സ്വാമിയെ തേടിയാണ് തെലങ്കാന പൊലീസ് കൊച്ചിയിലെത്തിയത്. സ്വാമി ഒളിവിലാണെന്നാണ് സൂചന. ഇയാളുമായി ബന്ധമുള്ള രണ്ട് പേരെ കസ്റ്റഡിയിലെടുത്തതായാണ് വിവരം.
നൽഗോണ്ട എസ്‌പി രമ രാജേശ്വരിയുടെ നേതൃത്വത്തിൽ കഴിഞ്ഞ ദിവസം കൊച്ചിയിൽ തെലങ്കാന പൊലീസ് പരിശോധന നടത്തിയിരുന്നു. കൊച്ചി പൊലീസുമായി സഹകരിച്ചാണ് തെലങ്കാന പൊലീസ് ടിആർഎസ്‌ എംഎൽഎമാരെ കൂറുമാറ്റാൻ ശ്രമിച്ച കേസിൽ അന്വേഷണം പുരോഗമിക്കുന്നത്.
