ഗവര്‍ണറുടെ നിലപാട് നിയമ വിരുദ്ധം, നിയമപരമായി ചോദ്യം ചെയ്യും; വി.ഡി. സതീശൻ

നിയമസഭ നിയമ ഭേദഗതി വരുത്തിയാൽ മാത്രമേ ചാൻസലർ പദവി ഒഴിയാൻ ഗവർണർക്ക് കഴിയുകയുള്ളൂവെന്നും സതീശൻ.

എറണാകുളം: ചാൻസലർ പദവി ഏറ്റെടുക്കില്ലെന്ന ഗവർണറുടെ നിലപാട് നിയമ വിരുദ്ധമാണെന്ന് പ്രതിപക്ഷ നേതാവ് വി.ഡി.സതീശൻ. ഗവർണറുടെ നിലപാട് നിയമപരമായി ചോദ്യം ചെയ്യും. നിയമനുസരിച്ച് അദ്ദേഹം ചാൻസലർ പദവിയിൽ തുടരണമെന്നും പ്രതിപക്ഷ നേതാവ് കൊച്ചിയിൽ ആവശ്യപ്പെട്ടു.

ചാൻസലർ പദവി ഏറ്റെടുക്കാൻ നിയമപരമായി ബാധ്യതയുള്ള ആളാണ് ഗവർണർ. നിയമസഭ പാസാക്കിയ സർവകലാശാല നിയമമനുസരിച്ച് ചാൻസലർ ഗവർണറാണ്. നിയമസഭ നിയമ ഭേദഗതി വരുത്തിയാൽ മാത്രമേ ചാൻസലർ പദവി ഒഴിയാൻ ഗവർണർക്ക് കഴിയുകയുള്ളൂ.

പദവി ഏറ്റെടുക്കില്ലെന്ന് പറയാൻ ഗവർണർക്ക് യാതൊരു അധികാരവുമില്ലന്നും വി.ഡി.സതീശൻ പറഞ്ഞു. ഗവർണർ ഇത്തരമൊരു നിലപാട് എടുക്കാനുള്ള കാരണം വേറൊരു വിഷയമാണ്. ഗവൺമെന്‍റ് നടത്തിയ നിയമവിരുദ്ധമായ ഇടപടലാണ് ഇതിന് കാരണമെന്ന കാര്യത്തിൽ സംശയമില്ല.

ആ വിഷയത്തിൽ പ്രതിപക്ഷത്തിന്‍റെ നിലപാടിൽ മാറ്റമില്ല. അതേ സമയം ഗവർണർ നിയമത്തിന് അതീതനായ ഒരാളെല്ല. നിയമമനുസരിച്ച് പ്രവർത്തിക്കാൻ ബാധ്യതയുള്ള വ്യക്തിയാണെന്നും പ്രതിപക്ഷ നേതാവ് പറഞ്ഞു. ഉന്നത വിദ്യാഭ്യാസ മന്ത്രി നിയമ വിരുദ്ധമായി ആവശ്യപ്പെട്ട കാര്യത്തിന് ഗവർണർ കയ്യൊപ്പ് ചാർത്തിയത് എന്തിനാണ്.

ഗവർണർ ചാനസലർ പദവിയിലിരുന്ന് നിയമ വിധേയമായി പ്രവർത്തിക്കുകയാണ് വേണ്ടത്. നിയമ വിരുദ്ധമായി ആര് പ്രവർത്തിച്ചാലും തങ്ങൾ നിയമപരമായ മാർഗം ആരായുമെന്നും പ്രതിപക്ഷ നേതാവ് വ്യക്തമാക്കി