എറണാകുളം: അത്യന്തം വിനാശകരമായ മദ്യനയത്തില്‍ നിന്ന് സര്‍ക്കാര്‍ പിന്മാറണമന്ന് കെ.സി.ബി.സി. സര്‍ക്കാരിന്‍റെ വിനാശകരമായ മദ്യനയത്തെ കേരള കത്തോലിക്ക സഭയിലെ എല്ലാ രൂപതകളും നഖശിഖാന്തം എതിര്‍ക്കുന്നു. വകതിരിവില്ലാത്ത ഒരു സമീപനമാണ് ഇപ്പോള്‍ സര്‍ക്കാര്‍ സ്വീകരിച്ചിരിക്കുന്നതെന്നും കെ.സി.ബി.സി ആരോപിച്ചു.
'സര്‍ക്കാരിന്‍റേത് ബാലിശമായ ചിന്താഗതി': ഒരു തലമുറയുടെ ജീവനും സ്വത്തിനും ആരോഗ്യത്തിനും പുല്ലുവില കൊടുക്കുന്ന സമീപനമാണിത്. മദ്യാസക്തിയിലേക്ക് ജനത്തെ തള്ളിവിടുന്ന ഈ സംസ്‌ക്കാരത്തെ നവോഥാനം എന്ന് എങ്ങനെ പേരുവിളിക്കാന്‍ കഴിയും. സംസ്ഥാനം നിക്ഷേപസൗഹൃദമാക്കാന്‍ കുടിയന്മാരെ സൃഷ്‌ടിക്കുക എന്നത് ബാലിശമായ ചിന്താഗതിയാണ്.
പഴവര്‍ഗങ്ങളില്‍ നിന്നുള്ള മദ്യ ഉത്പാദനം സാവാകാശം വിഷം കുത്തിവയ്ക്കുന്ന ഒരു കുത്സിത ഉപായമാണ്. സ്ത്രികളെ ആയിരിക്കും ഇത്തരം വീര്യംകുറഞ്ഞ മദ്യം ഒരു ദുരന്തമായി ബാധിക്കുക എന്നുള്ളതിന് തര്‍ക്കമില്ല. മദ്യവും ലഹരിയും മൂലം കുടുംബത്തിനും സമൂഹത്തിനും ഉണ്ടാകുന്ന നാശനഷ്‌ടങ്ങള്‍, അവ ഉണ്ടാക്കുന്ന ദുരന്തങ്ങള്‍ കാണുവാന്‍ സര്‍ക്കാരിന് കാഴ്ച്ച നഷ്‌ടപ്പെട്ടിരിക്കുന്നു.
'മദ്യനയത്തില്‍ സമൂല മാറ്റം വേണം': മദ്യലോബികളുടെ പ്രീണനങ്ങള്‍ക്ക് വഴിപ്പെട്ട് കേരളത്തെ മദ്യഭ്രാന്താലയമാക്കരുതെന്ന് വിനീതമായി അപേക്ഷിക്കുന്നു. അതോടൊപ്പം, പിടിച്ചെടുക്കുന്ന ലഹരി സാധനങ്ങള്‍ എവിടെയാണെന്നതിന് ജുഡീഷ്യല്‍ അന്വേഷണവും നടത്തേണ്ട കാലം അതിക്രമിച്ചിരിക്കുന്നു. ആവശ്യമായ കൂടിയാലോചനകള്‍ നടത്തണം.
കേരള സര്‍ക്കാരിന്‍റെ മദ്യനയത്തില്‍ സമൂല മാറ്റം ഉണ്ടാകണം. ഇത് കേരള കത്തോലിക്ക സഭയിലെ 32 രൂപതകളും ഐകകണ്‌ഠേന ആവശ്യപ്പെടുന്നു. അല്ലാത്തപക്ഷം, വ്യാപകമായ പ്രതിഷേധം ഈ വിഷയത്തില്‍ ഉണ്ടാകുമെന്നും കെ.സി.ബി.സി വെള്ളിയാഴ്‌ച പുറത്തുവിട്ട വാര്‍ത്താകുറിപ്പിലൂടെ മുന്നറിയിപ്പ് നൽകി.
ALSO READ | കുരുക്ക് മുറുകുന്നുവോ?! ദിലീപിന്‍റെ ഉടമസ്ഥതയിലുള്ള കാർ കസ്റ്റഡിയിലെടുത്ത് ക്രൈംബ്രാഞ്ച്
