എറണാകുളം: അപൂർവ ശസ്ത്രക്രിയയിലൂടെ ജീവിതത്തിലേക്ക് തിരിച്ചെത്തിയതിന്‍റെ ആഹ്‌ളാദത്തിലാണ് 35 കാരി വി.പി മൈമൂന. ശ്വാസകോശത്തിലും കരളിനോട് ചേർന്നും മുഴകള്‍ രൂപപ്പെട്ടത് മൈമൂനയെ ഗുരുതരാവസ്ഥയില്‍ എത്തിച്ചിരുന്നു. അപകട സാധ്യത ഏറെയുള്ള ശസ്ത്രക്രിയ നിരവധി ആശുപത്രി അധികൃതര്‍ ഏറ്റെടുക്കാന്‍ തയ്യാറായിരുന്നില്ല.
കൊച്ചി സൺറൈസ് ആശുപത്രി സീനിയര്‍ കാര്‍ഡിയോ തൊറാസിക് സര്‍ജന്‍ ഡോ.നാസര്‍ യൂസഫും സഹ ഡോക്ടർമാരും ആത്മവിശ്വാസത്തോടെ വെല്ലുവിളി ഏറ്റെടുത്തു. ഇതോടെ, അത്ഭുതങ്ങള്‍ സംഭവിക്കുകയായിരുന്നു. ഒമ്പത് മണിക്കൂർ നീണ്ടു നിന്ന ശസ്ത്രക്രിയയിലൂടെയാണ് മുഴകൾ മുഴുവനായി നീക്കം ചെയ്തത്.
കേരളത്തില്‍ അത്യപൂര്‍വമായി സ്വിരീകരിച്ച രോഗം
ശ്വാസകോശത്തിന്‍റെ മുക്കാല്‍ ഭാഗവും നിറഞ്ഞ് ഹൃദയത്തെ ഇടത് ഭാഗത്തേയ്ക്ക് തള്ളി മാറ്റിയ നിലയില്‍ ഒരു മുഴയും അതിന് ചുറ്റും ചെറുമുഴകളും കരളിനോട് ചേര്‍ന്ന് വയറിൽ മറ്റൊരുമുഴയുമാണ് മൈമൂനയുടെ ശരീരത്തില്‍ കണ്ടെത്തിയത്. നാടവിരയുടെ ലാര്‍വ നിറഞ്ഞുണ്ടാകുന്ന ഇത്തരം മുഴകളെ 'ഹൈഡാറ്റിഡ് മുഴകള്‍' എന്നാണ് വിളിക്കുന്നത്. പ്രധാനമായും കരളിനെയും, ശ്വാസകോശത്തെയും, തലച്ചോറിനെയും നശിപ്പിക്കുന്ന നാടവിരകളാണ് ഇത്തരം മുഴകള്‍ക്ക് കാരണമാകുന്നത്.
നാടവിരബാധിച്ച ആടുമാടുകള്‍, പന്നികള്‍, നായ്ക്കള്‍ എന്നിവയുമായുള്ള സമ്പര്‍ക്കത്തിലൂടെയും നന്നായി വേവിക്കാത്ത മാംസം ഭക്ഷിക്കുന്നതിലൂടെയുമാണ് മനുഷ്യരില്‍ ഈ രോഗബാധ ഉണ്ടാകുന്നത്. കേരളത്തില്‍ അത്യപൂര്‍വമായാണ് ഈ രോഗം കാണപ്പെടുന്നത്. ഏക പരിഹാര മാർഗം ശസ്ത്രക്രിയ മാത്രമാണ്.
നാല് കിലോയ്ക്ക് മുകളിൽ തൂക്കമുള്ളതും ഒരേ സമയം നെഞ്ചിലും വയറിലും പരസ്പരം ബന്ധപ്പെട്ടിരിക്കുന്ന ഹൈഡാറ്റിഡ് മുഴകൾ കേരളത്തിൽ ഒരു രോഗിയിൽ കണ്ടെത്തുന്നത് ആദ്യമായാണെന്നും ഡോ. നാസർ യൂസഫ് പറഞ്ഞു. ആശുപത്രിയില്‍ പ്രവേശിപ്പിച്ച ശേഷം നടത്തിയ പരിശോധനയില്‍ രോഗി കൊവിഡ് ബാധിതയാണെന്ന് സ്ഥിരീകരിച്ചതും വെല്ലുവിളിയായിരുന്നു.
അത്ഭുതകരമായി മൈമുന ജീവിതത്തിലേക്ക്...
കൊവിഡ് ഭേദമായപ്പോഴേയ്ക്കും വലത് ശ്വാസകോശം പൂര്‍ണമായും പ്രവര്‍ത്തനരഹിതമായി കഴിഞ്ഞിരുന്നു. വയറ്റിലെ മുഴ ഡയഫ്രം തുളച്ച് ശ്വാസകോശത്തില്‍ എത്തി വളരെ സങ്കീര്‍ണമായ അവസ്ഥയിലാണെന്നും കണ്ടെത്തി. മൈമൂനയുടെ കരളില്‍ ഉണ്ടായ വിരബാധ ഉരോദരഭിത്തി തുളച്ച് ശ്വാസകോശത്തില്‍ പ്രവേശിക്കുകയാണുണ്ടായത്.
വലിയ തോതിലുള്ള രക്തവാര്‍ച്ച ഉണ്ടായത് ശസ്ത്രക്രിയ കൂടുതല്‍ ദുഷ്‌കരമാക്കിയെന്ന് ഡോ. നാസര്‍ യൂസഫ് പറഞ്ഞു. ശസ്ത്രക്രിയയ്ക്ക് ശേഷം മൂന്ന് ദിവസം തീവ്രപരിചരണ വിഭാഗത്തില്‍ കഴിഞ്ഞ മൈമുന ജീവിതത്തിലേക്ക് മടങ്ങിയെത്തുകയായിരുന്നു.
തന്നെ വീണ്ടും ജീവിതത്തിലേക്ക് കൈപിടിച്ചുയര്‍ത്തിയ ഡോക്ടര്‍മാർക്കും ആശുപത്രി ജീവനക്കാര്‍ക്കും നന്ദിപറഞ്ഞാണ് മൈമൂന ആശുപത്രിയിൽ നിന്നും വീട്ടിലേക്ക് മടങ്ങിയത്. പാലക്കാട് സ്വദേശിയായ യുവതി മൂന്ന് കുട്ടികളുടെ അമ്മ കൂടിയാണ്.
ALSO READ: കൈവിടുന്നു കൊവിഡ്, അതീവ ജാഗ്രത വേണമെന്ന് ആരോഗ്യമന്ത്രി
