എറണാകുളം: സുപ്രീംകോടതി വിധിയുടെ മറവിൽ കോതമംഗലം മാര്‍തോമ ചെറിയപള്ളിക്കെതിരെ ഒരു വിഭാഗം നടത്തുന്ന സാമൂഹ്യ വിരുദ്ധ പ്രവർത്തനങ്ങൾ അവസാനിപ്പിക്കണമെന്ന് ആവശ്യപ്പെട്ട് മതമൈത്രി സംരക്ഷണ സമിതിയുടെ നേതൃത്വത്തിൽ ഉപവാസ സമരം നടത്തി. നാനാജാതിമതസ്ഥരുടെ അഭയകേന്ദ്രമായ കോതമംഗലം ചെറിയപള്ളിയും മുത്തപ്പന്‍റെ കബറിടവും കയ്യേറാൻ നടത്തുന്ന ശ്രമങ്ങളെ തടഞ്ഞ് കോതമംഗലത്ത് സമാധാനാന്തരീക്ഷം നിലനിർത്തണം എന്ന് ആവശ്യപ്പെട്ടാണ് ചെറിയ പള്ളിത്താഴത്ത് ഉപവാസ സമരം സംഘടിപ്പിച്ചത്. ബഹുജന പിന്തുണയോടെ നടന്ന ഉപവാസ സമരത്തിൽ വിവിധ രാഷ്ട്രീയ പാർട്ടി നേതാക്കളും വിവിധ മത സാമുദായിക നേതാക്കളും പങ്കെടുത്തു.
ഉപവാസസമരം കോതമംഗലം ടൗൺ ജുമാ മസ്ജിദ് ഇമാം അബ്ദുൽ സലാം അൽഖാസിമി ഉദ്ഘാടനം ചെയ്തു. കോതമംഗലം നിവാസികളെ സംബന്ധിച്ചിടത്തോളം മാര്‍തോമ ചെറിയ പള്ളിയിൽ നിലവിലെ സ്ഥിതി തുടരണമെന്നും നാനാജാതിമതസ്ഥരുടെ അഭയകേന്ദ്രമായ ചെറിയ പള്ളിയെ സംരക്ഷിക്കണമെന്നും ഉദ്ഘാടനപ്രസംഗത്തിൽ ഇമാം പറഞ്ഞു. വിശ്വാസികൾക്ക് അവരുടെ വിശ്വാസം കാത്തുസംരക്ഷിക്കാൻ അവസരം ഉണ്ടാകണമെന്നും പള്ളി സംരക്ഷിക്കേണ്ടത് നാടിന്‍റെ ആവശ്യമാണെന്നും സമരത്തിൽ പങ്കെടുത്തവർ പറഞ്ഞു.
