എറണാകുളം : ശബരിമലയിലെ അരവണ നിർമാണത്തിനുപയോഗിക്കുന്നത് ഗുണനിലവാരമില്ലാത്ത ഏലക്കയെന്ന് ലാബ് റിപ്പോർട്ട്. തിരുവനന്തപുരത്തെ സർക്കാർ ലാബിൽ നടത്തിയ പരിശോധനയിലാണ് ശബരിമലയിൽ അരവണ നിർമാണത്തിന് ഉപയോഗിക്കുന്ന ഏലക്കയ്‌ക്ക് ഗുണ നിലവാരമില്ലെന്ന കണ്ടെത്തൽ. അനുവദനീയമായ അളവിനേക്കാൾ കീടനാശിനിയുടെ അംശമടങ്ങിയ ഏലക്ക ഭക്ഷ്യ സുരക്ഷ മാനദണ്ഡപ്രകാരം സുരക്ഷിതമല്ലെന്നും ലാബ് റിപ്പോർട്ടിൽ പറയുന്നു.
അയ്യപ്പ സ്‌പൈസസ് കമ്പനി നൽകിയ ഹർജിയിൽ ഹൈക്കോടതി നിർദേശപ്രകാരമായിരുന്നു ശബരിമല എക്‌സിക്യുട്ടീവ് ഓഫിസർ ഏലക്കയുടെ സാമ്പിൾ ശേഖരിച്ച് പരിശോധനയ്‌ക്ക് അയച്ചത്. ലാബിന്‍റെ പരിശോധന റിപ്പോർട്ടടക്കം ഹൈക്കോടതി ദേവസ്വം ബഞ്ച് നാളെ വീണ്ടും പരിഗണിക്കും. കഴിഞ്ഞ വർഷം വരെ ശബരിമലയിലേക്ക് ഏലക്ക വിതരണം ചെയ്‌തത് അയ്യപ്പ സ്‌പൈസസ് ആയിരുന്നു.
എന്നാൽ ഇത്തവണ കൃത്യമായ ടെൻഡർ നടപടികളിലൂടെയല്ലാതെ പ്രാദേശിക വിതരണക്കാരന് കരാർ നൽകിയെന്നാരോപിച്ചായിരുന്നു ഹർജി. മാത്രവുമല്ല പമ്പയിലെ പരിശോധന അടിസ്ഥാനപ്പെടുത്തി കരാർ നൽകിയത് അനുചിതമെന്നും തിരുവനന്തപുരം സർക്കാർ ലാബിൽ പരിശോധന നടത്തണമെന്നും ആവശ്യമുന്നയിച്ചിരുന്നു. ഇതിന്‍റെ അടിസ്ഥാനത്തിലായിരുന്നു ഏലക്ക സാമ്പിൾ പരിശോധനയ്‌ക്ക് തിരുവനന്തപുരത്തെ ലാബിലേക്കയയ്‌ക്കാൻ കോടതി ഇടക്കാല ഉത്തരവിട്ടത്.
വിഷയം ജസ്റ്റിസുമാരായ അനിൽ കെ നരേന്ദ്രൻ, പി.ജി അജിത് കുമാർ എന്നിവരടങ്ങിയ ദേവസ്വം ബഞ്ച് നാളെ പരിഗണിക്കും. കിലോയ്‌ക്ക് 1558 രൂപയ്‌ക്കാണ് അരവണ നിർമാണത്തിന് ഏലക്ക നിലവിൽ ദേവസ്വം ബോർഡ് വാങ്ങിക്കൊണ്ടിരിക്കുന്നത്.
