ജീവന് ഭീഷണിയെന്ന് മന്ത്രി ജി സുധാകരനെതിരെ പരാതി നൽകിയ യുവതി

മന്ത്രിക്കെതിരെ പരാതി നൽകിയത് മുതൽ പിന്മാറണമെന്ന് ആവശ്യപ്പെട്ട് പല കോണുകളിൽ നിന്നും സമ്മര്‍ദമെന്ന് യുവതി.

ആലപ്പുഴ: ജീവന് ഭീഷണിയുണ്ടെന്ന് മന്ത്രി ജി സുധാകരനെതിരെ പരാതി നൽകിയ എസ്എഫ്ഐ മുൻ നേതാവും മന്ത്രിയുടെ മുൻ പേഴ്സണൽ സ്റ്റാഫ് അംഗത്തിന്‍റെ ഭാര്യയുമായ യുവതി. മന്ത്രിക്കെതിരെ പരാതി നൽകിയത് മുതൽ പിന്മാറണമെന്ന് ആവശ്യപ്പെട്ട് പല കോണുകളിൽ നിന്നും സമ്മര്‍ദമുണ്ട്. തനിക്കും കുടുംബാംഗങ്ങൾക്കും ജീവന് ഭീഷണിയുണ്ടെന്നും പരാതിക്കാരി മാധ്യമങ്ങളോട് വെളിപ്പെടുത്തി.

മന്ത്രിക്കെതിരായ പരാതിയുടെ പേരിൽ തങ്ങളെ ക്രൂശിക്കുന്നത് അവസാനിപ്പിക്കണം. ജീവിക്കാൻ അനുവദിക്കണമെന്നും യുവതി പറഞ്ഞു. ഏപ്രിൽ 11ന് നടത്തിയ വാർത്താസമ്മേളനം 14ന് രാത്രിയാണ് തന്‍റെ ശ്രദ്ധയിൽപ്പെടുന്നത്. ഉടൻ തന്നെ താൻ അമ്പലപ്പുഴ പൊലീസിൽ പരാതി നൽകുകയായിരുന്നു. എന്നാൽ കഴിഞ്ഞ ദിവസമാണ് മൊഴിയെടുക്കാൻ പൊലീസ് തയ്യാറായത്. മന്ത്രിയുടെ സമ്മർദത്തെ തുടർന്ന് പൊലീസ് കേസെടുക്കാൻ മടിക്കുകയാണെന്നും യുവതി ആരോപിച്ചു. പൊലീസ് തന്‍റെ പരാതിയിന്മേൽ കേസെടുക്കാൻ തയ്യാറായില്ലെങ്കിൽ കോടതിയെ സമീപിക്കുമെന്നും യുവതി വ്യക്തമാക്കി.