പാരീസ് : കളിമണ്‍ കോര്‍ട്ടിലെ സെറീന വില്യംസിന്‍റെ ഗ്രാന്‍ഡ് സ്ലാം പോരാട്ടങ്ങള്‍ ക്വാര്‍ട്ടര്‍ കാണാതെ അവസാനിച്ചു. പ്രീ ക്വാര്‍ട്ടറില്‍ കസാക്കിസ്ഥാന്‍റെ എലേന റിബാക്കിനയോട് നേരിട്ടുള്ള സെറ്റുകള്‍ക്കാണ് യുഎസ്‌ ഏഴാം സീഡായ സെറീന പരാജയപ്പെട്ടത്. സ്‌കോര്‍: 6-3, 7-5. ഒരു മണിക്കൂറും 17 മിനിട്ടും നീണ്ട മത്സരത്തിലെ ആദ്യ സെറ്റ് അനായാസം ജയിച്ച 21 കാരിയായ റിബാക്കിന രണ്ടാം സെറ്റില്‍ സെറീനയുടെ പ്രതിരോധത്തെ സമര്‍ഥമായി മറികടന്നു.
ടെന്നിസ് ഇതിഹാസം മാര്‍ഗരറ്റ് കോര്‍ട്ടിന്‍റെ 24 ഗ്രാന്‍ഡ്സ്ലാം കിരീടമെന്ന റെക്കോഡിനൊപ്പമെത്താനുള്ള സെറീനയുടെ ശ്രമങ്ങള്‍ക്ക് പരാജയം തിരിച്ചടിയായി. 23 ഗ്രാന്‍ഡ് സ്ലാമുകള്‍ സ്വന്തമാക്കിയ സെറീനയ്ക്ക് ഇനി ഒരു തവണ കൂടി കപ്പടിച്ചാല്‍ മാര്‍ഗരറ്റിന് ഒപ്പമെത്താം.
കൂടുതല്‍ കായിക വാര്‍ത്തകള്‍: ഒളിമ്പിക് യോഗ്യതാ മത്സരത്തിൽ പങ്കെടുക്കുന്ന അത്‌ലറ്റുകൾക്ക് വാക്‌സിൻ നൽകണമെന്ന്‌ പി.ടി ഉഷ
പുരുഷവിഭാഗം സിംഗിള്‍സില്‍ ഗ്രീസിന്‍റെ സ്റ്റെഫാനോസ് സിറ്റ്സിപാസും റഷ്യയുടെ ഡാനില്‍ മെദ്‌വദേവും ക്വാര്‍ട്ടര്‍ ഫൈനല്‍ യോഗ്യത സ്വന്തമാക്കി. ഇന്ന് രാത്രി 7.30ന് നടക്കുന്ന പ്രീ ക്വാര്‍ട്ടര്‍ പോരാട്ടത്തില്‍ കളിമണ്‍ കോര്‍ട്ടിലെ രാജാവ് റഫേല്‍ നദാല്‍ ഇറ്റലിയുടെ ജാനിക് സന്നറിനെ നേരിടും.
