ലണ്ടന്‍: പ്രീമിയര്‍ ലീഗില്‍ (Premier League) ടോട്ടന്‍ഹാമിനും (Tottenham) ന്യൂകാസില്‍ യുണൈറ്റഡിനും (Newcastle United) തോല്‍വി. പോയിന്‍റ് പട്ടികയില്‍ തങ്ങളേക്കാള്‍ പിന്നിലുള്ള വെസ്റ്റ്ഹാമും (West Ham) എവര്‍ട്ടണുമാണ് (Everton) ഇരു ടീമുകളെയും പരാജയപ്പെടുത്തിയത്. ലീഗില്‍ ടോട്ടന്‍ഹാമിന്‍റെ നാലാമത്തെയും ന്യൂകാസിലിന്‍റെ അഞ്ചാമത്തെയും തോല്‍വിയാണിത്.
തകര്‍ന്നടിഞ്ഞ് ടോട്ടന്‍ഹാം: ഇന്ന് (ഡിസംബര്‍ 8) പുലര്‍ച്ചെ ഹോട്‌സ്‌പര്‍ സ്റ്റേഡിയത്തില്‍ നടന്ന മത്സരത്തില്‍ വെസ്റ്റ്ഹാമിനോട് ഒന്നിനെതിരെ രണ്ട് ഗോളുകള്‍ക്കാണ് ടോട്ടന്‍ഹാം തോല്‍വി വഴങ്ങിയത് (Tottenham vs West Ham Match Result). ജാറഡ് ബോവന്‍ (Jarrod Bowen), ജെയിംസ് വാര്‍ഡ് പ്രൗസ് (James Ward-Prowse) എന്നിവരുടെ ഗോളുകളാണ് വെസ്റ്റ്ഹാമിന് ജയം സമ്മാനിച്ചത്. ക്രിസ്റ്റ്യന്‍ റൊമേറോവായിരുന്നു ടോട്ടന്‍ഹാമിന്‍റെ ഗോള്‍ സ്കോറര്‍.
പന്തടക്കത്തിലും ആക്രമണത്തിലുമെല്ലാം വെസ്റ്റ്ഹാമിനേക്കാള്‍ മുന്നിട്ടുനിന്നത് ആതിഥേയരായ ടോട്ടന്‍ഹാമായിരുന്നു. ആദ്യ വിസില്‍ മുതല്‍ തന്നെ അവര്‍ വെസ്റ്റ്ഹാം നിരയെ പ്രതിരോധത്തിലാക്കി. തുടക്കത്തിലെ തുടര്‍ച്ചയായ നീക്കങ്ങള്‍ക്കൊടുവില്‍ മത്സരത്തിന്‍റെ 11-ാം മിനിറ്റില്‍ തന്നെ അവര്‍ ലീഡും പിടിച്ചു.
പോറോ നല്‍കിയ പാസില്‍ നിന്നാണ് ക്രിസ്റ്റ്യന്‍ റൊമേറോ ആതിഥേയര്‍ക്കായി ആദ്യ ഗോള്‍ നേടിയത്. തുടര്‍ന്നും ടോട്ടന്‍ഹാം ഗോള്‍ ശ്രമം നടത്തിക്കൊണ്ടേയിരുന്നു. എന്നാല്‍, ആദ്യ പകുതിയില്‍ പിന്നീട് ലീഡ് ഉയര്‍ത്താന്‍ അവര്‍ക്കായില്ല.
രണ്ടാം പകുതിയുടെ തുടക്കത്തില്‍ തന്നെ വെസ്റ്റ്ഹാം സമനില ഗോള്‍ കണ്ടെത്തി. 52-ാം മിനിറ്റില്‍ ജാറഡ് ബോവന്‍ ആണ് ടോട്ടന്‍ഹാമിന്‍റെ വലയില്‍ പന്തെത്തിച്ചത്. 74-ാം മിനിറ്റില്‍ ജെയിംസ് വാര്‍ഡ് പ്രൗസ് അവരുടെ വിജയഗോളും നേടി.
ടോട്ടന്‍ഹാം തിരിച്ചടിക്കാനുള്ള ശ്രമങ്ങള്‍ നടത്തിയെങ്കിലും അവര്‍ക്ക് ഗോളുകളൊന്നും നേടാന്‍ സാധിച്ചില്ല. അവസാന അഞ്ച് മത്സരങ്ങളില്‍ നിന്നും ടോട്ടന്‍ഹാം വഴങ്ങുന്ന നാലാമത്തെ തോല്‍വിയാണിത്. പോയിന്‍റ് പട്ടികയില്‍ നിലവില്‍ അഞ്ചാം സ്ഥാനത്താണ് ടോട്ടന്‍ഹാം. 24 പോയിന്‍റോടെ വെസ്റ്റ്ഹാം ഒന്‍പതാം സ്ഥാനത്ത് തുടരുകയാണ്.
ന്യൂകാസിലിനെ ഞെട്ടിച്ച് എവര്‍ട്ടണ്‍: പ്രീമിയര്‍ ലീഗില്‍ ന്യൂകാസില്‍ യുണൈറ്റഡിനെ പരാജയപ്പെടുത്തി എവര്‍ട്ടണ്‍. ഗുഡിസണ്‍ പാര്‍ക്കില്‍ നടന്ന മത്സരത്തില്‍ എതിരില്ലാത്ത മൂന്ന് ഗോളുകള്‍ക്കാണ് എവര്‍ട്ടണിന്‍റെ ജയം (Everton vs Newcastle United Match Result). രണ്ടാം പകുതിയിലാണ് എവര്‍ട്ടണ്‍ മത്സരത്തിലെ മൂന്ന് ഗോളും നേടിയത്.
ഡ്വിറ്റ് മക്‌നീല്‍ (Dwight McNeil), അബ്‌ദുലെയ് ഡുകൂഹെ (Abdoulaye Doucouré), ബെറ്റോ (Beto) എന്നിവരാണ് എവര്‍ട്ടണിനായി ഗോള്‍ നേടിയത്. ജയത്തോടെ പോയിന്‍റ് പട്ടികയില്‍ 17-ാം സ്ഥാനത്തേക്ക് എത്താന്‍ അവര്‍ക്കായി. ഏഴാം സ്ഥാനത്താണ് ന്യൂകാസില്‍ യുണൈറ്റഡ്.
Also Read : മക്‌ടോമിനെയുടെ 'ഡബിള്‍', ചെല്‍സിയെ വീഴ്‌ത്തി മാഞ്ചസ്റ്റര്‍ യുണൈറ്റഡ്; പോയിന്‍റ് പട്ടികയിലും മുന്നേറ്റം
