മാഞ്ചസ്റ്റര്‍: ഇംഗ്ലീഷ്‌ പ്രീമിയര്‍ ലീഗിലെ മാഞ്ചസ്റ്റര്‍ ഡെര്‍ബിയില്‍ യുണൈറ്റഡിനെതിരെ സിറ്റിക്ക് അനായാസ ജയം. തട്ടകമായ ഇത്തിഹാദ് സ്റ്റേഡിയത്തിൽ നടന്ന മത്സരത്തില്‍ ഒന്നിനെതിരെ നാല് ഗോളുകൾക്കാണ് മാഞ്ചസ്റ്റര്‍ സിറ്റിയുടെ വിജയം. സിറ്റിക്കായി കെവിൻ ഡി ബ്രൂയിനും, റിയാദ് മഹ്‌റസും ഇരട്ട ഗോളുകള്‍ നേടി. ജേഡന്‍ സാഞ്ചോയാണ് യുണൈറ്റഡിനായി ലക്ഷ്യം കണ്ടത്.
മത്സരത്തിന്‍റെ തുടക്കം മുതല്‍ക്ക് തന്നെ ആധിപത്യം പുലര്‍ത്തിയ സിറ്റി അഞ്ചാം മിനിട്ടില്‍ തന്നെ ഡി ബ്രൂയിനിലൂടെ മുന്നിലെത്തി. 22ാം മിനിട്ടില്‍ സാഞ്ചോയിലൂടെ യുണൈറ്റഡ് തിരിച്ചടിച്ചു. എന്നാല്‍ 28ാം മിനിട്ടില്‍ ഡി ബ്രൂയിനിലൂടെ സിറ്റി വീണ്ടും മുന്നിലെത്തി. തുടര്‍ന്ന് 68, 91 മിനിട്ടുകളിലാണ് മഹ്‌റസ് ലക്ഷ്യം കണ്ടത്.
മത്സരത്തിന്‍റെ 70 ശതമാനവും പന്ത് കൈവശം വെച്ച സിറ്റി ലക്ഷ്യത്തിലേക്ക് 10 ഷോട്ടുകളുമുതിര്‍ത്തു. എന്നാല്‍ രണ്ട് തവണ മാത്രമാണ് യുണൈറ്റഡിന് ലക്ഷ്യത്തിലേക്ക് ശ്രമം നടത്താനായത്. വിജയത്തോടെ 28 മത്സരങ്ങളിൽ നിന്നും 69 പോയിന്‍റോടെ ലീഗിന്‍റെ തലപ്പത്ത് തുടരുകയാണ് സിറ്റി.
also read: ISL 2022 | ഗോവയ്‌ക്കെതിരെ കേരള ബ്ലാസ്റ്റേഴ്‌സിന് ആവേശ സമനില
27 മത്സരങ്ങളില്‍ 63 പോയിന്‍റുമായി രണ്ടാം സ്ഥാനത്തുള്ള ലിവര്‍പൂളിനേക്കാള്‍ ആറ് പോയിന്‍റിന്‍റെ വ്യത്യാസമാണ് സിറ്റിക്കുള്ളത്. 26 മത്സരങ്ങളില്‍ 53 പോയിന്‍റുള്ള ചെല്‍സിയാണ് മൂന്നാമത്. അതേസമയം 28 മത്സരങ്ങളില്‍ 47 പോയിന്‍റുമാത്രമുള്ള യുണൈറ്റഡ് അഞ്ചാം സ്ഥാനത്താണ്.
