ന്യൂയോര്‍ക്ക്: ലോകത്തെ ഏറ്റവും സമ്പന്നനായ കായിക താരമായി മിക്‌സഡ് മാര്‍ഷ്യല്‍ ആര്‍ടിസ്റ്റ് കോന മഗ്വയറെ തെരഞ്ഞെടുത്ത് ഫോബ്‌സ് മാഗസിന്‍. അമേരിക്കന്‍ ബിസിനസ് മാഗസിനാണ് ഫോബ്‌സ്. ഫുട്‌ബോള്‍ ലോകത്തെ മിശിഹ ലയണല്‍ മെസി, പോര്‍ച്ചുഗീസ് സൂപ്പര്‍ ഫോര്‍വേഡ് ക്രിസ്റ്റ്യാനോ റൊണാള്‍ഡോ എന്നിവരെ മറികടന്നാണ് ഐറിഷ് ഗുസ്‌തി താരം മഗ്വയര്‍ ഫോബ്‌സ് പട്ടികയില്‍ ഒന്നാമതായത്. 2020ല്‍ 180 ദശലക്ഷം യുഎസ്‌ ഡോളറാണ് ഐറിഷ് താരത്തിന്‍റെ വാര്‍ഷിക വരുമാനമെന്ന് ഫോബ്‌സ് പറയുന്നു. ഏകദേശം 1326 കോടി രൂപയോളം വരും ഈ തുക.
വരുമാനത്തില്‍ ഭൂരിഭാഗവും ഇടിക്കൂട്ടിന് പുറത്ത് നിന്നുമാണ് ലഭിച്ചത്. 128 ദശലക്ഷം യുഎസ്‌ ഡോളറാണ് പരസ്യത്തില്‍ നിന്ന് ഉള്‍പ്പെടെ ലഭിച്ചത്. കഴിഞ്ഞ വര്‍ഷം ഒരു തവണ മാത്രമാണ് മഗ്വയര്‍ റിങ്ങിലെത്തിയത്. ജനുവരിയില്‍ നടന്ന ഇടിക്കൂട്ടിലെ പോരാട്ടത്തില്‍ ഡോണാള്‍ഡ് സിറോണിനെയാണ് മഗ്വയര്‍ പരാജയപ്പെടുത്തിയത്. ഇതിലൂടെ 22 ദശലക്ഷം യുഎസ്‌ ഡോളറും മഗ്വയര്‍ സ്വന്തമാക്കി. ഇടിക്കൂട്ടിന് പുറത്ത് ബ്രാന്‍ഡ് അംബാസിഡറായും പരസ്യങ്ങളിലൂടെയുമാണ് മഗ്വയറിന്‍റെ വരുമാനത്തില്‍ ഏറിയ പങ്കും ലഭിച്ചത്. മദ്യക്കമ്പിനികളുടെ ഉള്‍പ്പെടെ പരസ്യങ്ങളില്‍ മഗ്വയര്‍ പ്രത്യക്ഷപെട്ടിരുന്നു.
കൂടുതല്‍ വായനക്ക്:ലാലിഗയില്‍ കിരീടം തൊടാൻ സമനിലക്കളി, ബാഴ്‌സയും കുരുക്കില്‍
കൊവിഡ് പശ്ചാത്തലത്തിലും മഗ്വയര്‍ ഉള്‍പ്പെടെ ലോകത്തെ നാല് കായിക താരങ്ങള്‍ മാത്രമാണ് 100 ദശലക്ഷം യുഎസ്‌ ഡോളറില്‍ അധികം സമ്പാദിച്ചത്. പട്ടികയില്‍ രണ്ടാമത് അര്‍ജന്‍റീനന്‍ സൂപ്പര്‍ ഫോര്‍വേഡ് ലയണല്‍ മെസി 130 ദശലക്ഷം യുഎസ്‌ ഡോളറും പോര്‍ച്ചുഗീസ് സൂപ്പര്‍ ഫോര്‍വേഡ് ക്രിസ്റ്റ്യാനോ റൊണാള്‍ഡോക്ക് 120 ദശലക്ഷം യുഎസ്‌ ഡോളറും കഴിഞ്ഞ വര്‍ഷം സമ്പാദിച്ചു. ഇരുവരെയും കൂടാതെ നെയ്‌മര്‍ ജൂനിയറാണ് കാല്‍പന്തിന്‍റെ ലോകത്ത് നിന്നും ഫോബ്‌സ് പട്ടികയില്‍ ആദ്യപത്തില്‍ ഉള്‍പ്പെട്ടത്. ബ്രസീലിയന്‍ ഫോര്‍വേഡ് നെയ്‌മര്‍ക്ക് കഴിഞ്ഞ വര്‍ഷം 67 ദശലക്ഷം യുഎസ്‌ ഡോളറിന്‍റെ സമ്പാദ്യമാണുള്ളത്.
ഫോര്‍മുല വണ്‍ റേസ്‌ ട്രാക്കിലെ നിലവിലെ ചാമ്പ്യന്‍ ലൂയിസ് ഹാമില്‍ട്ടണും ആദ്യ പത്തില്‍ ഇടം പിടിച്ചു. 58 ദശലക്ഷം യുഎസ്‌ ഡോളര്‍ വരുമാനമുള്ള ഹാമില്‍ട്ടണ്‍ പട്ടികയില്‍ എട്ടാമതാണ്. ഫോബ്‌സ് കഴിഞ്ഞ വര്‍ഷം പുറത്തുവിട്ട പട്ടികയില്‍ ഒന്നാം സ്ഥാനത്തുണ്ടായിരുന്ന ടെന്നീസ് കോര്‍ട്ടിലെ രാജകുമാരന്‍ റോജര്‍ ഫെഡറര്‍ ഇത്തവണ ഏഴാമതായി. 64 മില്യണ്‍ യുഎസ്‌ ഡോളറാണ് ഫെഡററുടെ കഴിഞ്ഞ വര്‍ഷത്തെ വരുമാനം.
