ദോഹ : ലോകകപ്പ് പ്രീ ക്വാര്‍ട്ടര്‍ പോരാട്ടത്തില്‍ ഇന്ന് നിലവിലെ റണ്ണര്‍ അപ്പുകളായ ക്രൊയേഷ്യ എഷ്യന്‍ കരുത്തരായ ജപ്പാനെ നേരിടും. അല്‍ ജനൂബ് സ്‌റ്റേഡിയത്തില്‍ രാത്രി 8:30 മുതലാണ് മത്സരം. തോല്‍വി അറിയാതെയെത്തുന്ന ക്രൊയേഷ്യയും മരണഗ്രൂപ്പില്‍ ചാമ്പ്യന്മാരായി മുന്നേറ്റം നടത്തിയ ജപ്പാനും നേര്‍ക്കുനേര്‍ വരുമ്പോള്‍ തീപാറും പോരാട്ടം തന്നെ പ്രതീക്ഷിക്കാം.
ലോകമാമാങ്ക വേദിയില്‍ ഇതിന് മുന്‍പ് രണ്ട് തവണയാണ് ഇരു ടീമുകളും ഏറ്റുമുട്ടിയിട്ടുള്ളത്. 1998ല്‍ ക്രൊയേഷ്യ ജയം പിടിച്ചപ്പോള്‍ 2006ലെ മത്സരം സമനിലയിലാണ് കലാശിച്ചത്. അവസാന എട്ടില്‍ ഒരു സ്ഥാനം ലക്ഷ്യമിട്ട് ഇരു ടീമും കൊമ്പുകോര്‍ക്കുമ്പോള്‍ മത്സരഫലം പ്രവചനാതീതമാണ്.
വമ്പന്മാരെ കൊന്ന് കൊലവിളിച്ച ജപ്പാന് : പ്രവചനങ്ങള്‍ അപ്പാടെ കാറ്റില്‍ പറത്തിയ ജപ്പാന് സ്വപ്‌ന തുല്യമായ തുടക്കമാണ് ഖത്തറില്‍ ലഭിച്ചത്. ഗ്രൂപ്പ് ഘട്ടത്തിലെ ആദ്യ മത്സരത്തില്‍ മുന്‍ ലോക ചാമ്പ്യന്മാരായ ജര്‍മനിയെ അട്ടിമറിച്ച ജപ്പാന്, അവസാന മത്സരത്തില്‍ സ്‌പെയിനിനെയും തകര്‍ത്തെറിഞ്ഞു. ഒന്നിനെതിരെ രണ്ട് ഗോളിനായിരുന്നു രണ്ട് മത്സരങ്ങളിലും ജാപ്പനീസ് പടയുടെ വിജയം.
ടീം ഗെയിമാണ് ജപ്പാന്‍റെ ശക്തി. കുറിയ പാസുകളിലൂടെ എതിര്‍ ബോക്‌സിലേക്ക് പാഞ്ഞടുക്കുന്നതാണ് ടീമിന്‍റെ കളിശൈലി. യൂറോപ്യന്‍ ലീഗുകളില്‍ പന്ത് തട്ടുന്ന ഒരുപിടി താരങ്ങളും ടീമിനെ കൂടുതല്‍ കരുത്തുറ്റതാക്കുന്നു.
മുന്നേറാന്‍ ക്രൊയേഷ്യ : പേരിനൊത്ത പ്രകടനമല്ല കഴിഞ്ഞ ലോകകപ്പിലെ റണ്ണര്‍ അപ്പുകളായ ക്രൊയേഷ്യ ഈ ലോകകപ്പില്‍ ഇതുവരെ പുറത്തെടുത്തത്. നായകന്‍ ലൂക്ക മോഡ്രിച്ച് നേതൃത്വം നല്‍കുന്ന മധ്യനിരയിലാണ് ടീമിന്‍റെ പ്രതീക്ഷ. പെരിസിച്ചും, ലാവിച്ചും മുന്നേറ്റ നിരയില്‍ ഗോള്‍ കണ്ടെത്തേണ്ടതുണ്ട്.
Also Read: അവസാന എട്ടിലെത്താന്‍ കാനറിപ്പട, എതിരാളികള്‍ ദക്ഷിണ കൊറിയ
ഗ്രൂപ്പ് ഘട്ടത്തിലെ മൂന്ന് മത്സരങ്ങളില്‍ നിന്നും രണ്ട് ഗോളടിച്ച ക്രമാറിച്ചിന്‍റെ പ്രകടനവും ജാപ്പനീസ് പടയ്‌ക്കെതിരായ പ്രീ ക്വാര്‍ട്ടര്‍ പോരാട്ടത്തില്‍ നിര്‍ണായകമാകും. ക്രൊയേഷ്യന്‍ പ്രതിരോധനിര ഈ ലോകകപ്പില്‍ ഇതുവരെ കാര്യമായി പരീക്ഷിക്കപ്പെട്ടിട്ടില്ല. ഗ്രൂപ്പ് എഫില്‍ ഒരു ജയവും രണ്ട് സമനിലയുമായി രണ്ടാം സ്ഥാനക്കാരായാണ് യൂറോപ്യന്‍ ടീം അവസാന പതിനാറില്‍ കടന്നത്.
