സൂറിച്ച്: 'ചുംബന വിവാദത്തില്‍' (kiss controversy) സ്പാനിഷ് ഫുട്ബോൾ അസോസിയേഷൻ മേധാവി ലൂയിസ് റൂബിയാലെസിനെ ഫിഫ സസ്പെൻഡ് ചെയ്തു (FIFA suspended Spanish football association chief Luis Rubiales). വനിത ലോകകപ്പില്‍ (FIFA Womens World Cup 2023) സ്‌പെയ്‌നിന്‍റെ വിജയത്തിന് ശേഷം ടീമിലെ ജെന്നിഫര്‍ ഹെര്‍മോസോയെ (Jennifer Hermoso) അനുവാദമില്ലാതെ ചുംബിച്ചതിനാണ് ലൂയിസ് റൂബിയാലെസിനെതിരെ ഫിഫ നടപടി. 90 ദിവസത്തേക്കാണ് ലൂയിസ് റൂബിയാലെസിനെ ഫിഫ സസ്പെൻഡ് ചെയ്‌തിരിക്കുന്നത്.
കൂടാതെ ജെന്നിഫര്‍ ഹെർമോസോയുമായി ബന്ധപ്പെടുന്നതിൽ നിന്നും റൂബിയാലെസിന് വിലക്കുണ്ട്. വനിത താരത്തിനെതിരായ ലൂയിസ് റൂബിയാലെസിന്‍റെ അനുചിതമായ പെരുമാറ്റത്തിനെതിരെ വിവിധ കോണുകളില്‍ നിന്നും കടുത്ത വിമര്‍ശനങ്ങളുയര്‍ന്നിരുന്നു. സ്പാനിഷ് ഫുട്ബോൾ അസോസിയേഷൻ മേധാവി സ്ഥാനത്ത് നിന്നും ലൂയിസ് റൂബിയാലെസിനെ നീക്കിയില്ലെങ്കില്‍ അന്താരാഷ്ട്ര മത്സരങ്ങൾ കളിക്കില്ലെന്ന് സ്പാനിഷ് വനിത ഫുട്‌ബോളർമാർ അറിയിച്ചതായാണ് റിപ്പോര്‍ട്ടുകള്‍.
ജെന്നിഫര്‍ ഹെര്‍മോസോയെ ചുംബിച്ചത് പരസ്പര സമ്മതമുള്ളതുകൊണ്ടാണെന്ന് പറഞ്ഞ് തന്‍റെ പ്രവര്‍ത്തിയെ ന്യായീകരിക്കാന്‍ നേരത്തെ ലൂയിസ് റൂബിയാലെസ് ശ്രമം നടത്തിയിരുന്നു. തന്‍റെ പെണ്‍മക്കളില്‍ ഒരാള്‍ക്ക് നല്‍കുന്ന വിധത്തിലായിരുന്നു ആ ചുംബനമെന്നുമായിരുന്നു റൂബിയാലെസ് പറഞ്ഞത്. എന്നാല്‍ തന്‍റെ സമ്മതത്തോടെയല്ല ചുംബനം നടന്നതെന്ന് ജെന്നിഫര്‍ ഹെര്‍മോസോ ഇതിന് മറുപടി നല്‍കിയിരുന്നു.
ഒരു സോഷ്യല്‍ മീഡിയ പോസ്റ്റിലൂടെയായിരുന്നു താരം റൂബിയാലെസിനെതിരെ പ്രതികരിച്ചത്. ഇത്തരത്തിലുള്ള പെരുമാറ്റങ്ങൾക്ക് ഒരു കായിക ഇനത്തിലോ, ഒരു സാമൂഹിക വ്യവസ്ഥയിലോ ഒരിക്കലും ഒരാളും ഇരയാവാന്‍ പാടില്ല. ഒരു സമ്മതവുമില്ലാതെയുണ്ടായ ലൈംഗിക പ്രവൃത്തിയാണത് എന്നായിരുന്നു താരം ഇതേക്കുറിച്ച് പ്രതികരിച്ചത്.
സംഭവത്തില്‍ ജെന്നിഫര്‍ ഹെര്‍മോസോയെ പിന്തുണച്ച് ലോകകപ്പിലെ രണ്ടാം സ്ഥാനക്കാരായ ഇംഗ്ലണ്ട് ടീം രംഗത്ത് എത്തിയിരുന്നു. സംഭവം ഒരിക്കലും അംഗീകരിക്കാന്‍ കഴിയില്ല. റൂബിയാലെസിന്‍റെ ഭാഗത്ത് നിന്നും ലൈംഗികാതിക്രമമാണ് ഉണ്ടായിരിക്കുന്നത്. അത് എല്ലാവരും കണ്ടതാണ്. ഇത്തരക്കാരെ വച്ചുപൊറുപ്പിക്കരുതെന്ന് അവര്‍ പ്രസ്‌താവനയില്‍ പറഞ്ഞു. ഹെമോസോയ്‌ക്ക് എല്ലാ പിന്തുണയും ഇംഗ്ലണ്ട് ടീം പ്രഖ്യാപിച്ചിട്ടുണ്ട്.
അതേസമയം സിഡ്‌നിയിലെ സ്റ്റേഡിയം ഓസ്ട്രേലിയയില്‍ നടന്ന വനിത ഫുട്‌ബോള്‍ ലോകകപ്പിന്‍റെ ഫൈനലില്‍ എതിരില്ലാത്ത ഒരു ഗോളിനായിരുന്നു സ്പാനിഷ് വനിതകള്‍ (Spain women football team) ഇംഗ്ലണ്ടിനെ (England women football team) തോല്‍പ്പിച്ചത്. ക്യാപ്റ്റന്‍ ഓള്‍ഗ കാര്‍മോണ (Olga Carmona) ആയിരുന്നു ടീമിന്‍റെ വിജയ ഗോള്‍ നേടിയത്. വനിത ലോകകപ്പില്‍ സ്‌പെയിനിന്‍റെ കന്നി ലോകകപ്പ് കിരീടമാണിത്.
മത്സര ശേഷമുള്ള സമ്മാനദാന ചടങ്ങിനിടെ ഓരോ താരത്തേയും കവിളിൽ ചുംബിച്ചുകൊണ്ടും ആലിംഗനം ചെയ്‌തുമാണ് റുബിയാലെസ് അഭിനന്ദിച്ചത്. ഹെമോസോ എത്തിയപ്പോള്‍ താരത്തിന്‍റെ ചുണ്ടിലായിരുന്നു സ്പാനിഷ് ഫുട്ബോൾ അസോസിയേഷൻ മേധാവി ചുംബിച്ചത്.
