മാഞ്ചസ്റ്റർ: ഇംഗ്ലീഷ് പ്രീമിയർ ലീഗിൽ ടോട്ടൻഹാമിനെതിരായ മത്സരം പൂർത്തിയാകുന്നതിന് മുന്നേ ഗ്രൗണ്ട് വിട്ട സൂപ്പർ താരം ക്രിസ്റ്റ്യാനോ റൊണാൾഡോയുടെ നടപടി ഏറെ വിവാദങ്ങൾക്കാണ് വഴിവച്ചത്. ആദ്യ ഇലവനിലും പകരക്കാരനായും തന്നെ കളത്തിലിറക്കാത്തതാണ് താരത്തെ ചൊടുപ്പിച്ചത്. ഇപ്പോൾ താരം പകരക്കാരനായി കളത്തിലിറങ്ങാൻ വിസമ്മതിച്ചു എന്ന് വ്യക്‌തമാക്കിയിരിക്കുകയാണ് പരിശീലകൻ എറിക് ടെൻ ഹാഗ്.
പകരക്കാരനായി ഇറങ്ങാൻ റെണാൾഡോ വിമുഖത കാട്ടിയോ എന്ന മാധ്യമപ്രവർത്തകരുടെ ചോദ്യത്തിനാണ് ടെൻ ഹാഗ് അതെ എന്ന് മറുപടി നൽകിയത്. താനാണ് ടീമിന്‍റെ പരിശീലകൻ എന്നും അതിനാൽ ടീമിനകത്ത് നിലനിൽക്കുന്ന സംസ്‌കാരത്തിന് താനാണ് ഉത്തരവാദി എന്നും ടെൻ ഹാഗ് വ്യക്‌തമാക്കി. ഫുട്ബോള്‍ എന്നത് ടീം ഗെയിമാണ്. അതുകൊണ്ടുതന്നെ അതിന് അതിന്‍റേതായ ചില നിബന്ധനകൾ പാലിക്കേണ്ടതുണ്ട്.
അത് താരങ്ങൾ പാലിക്കുന്നുണ്ടോ എന്ന് ഉറപ്പുവരുത്തേണ്ടത് പരിശീലകനെന്ന നിലയില്‍ തന്‍റെ ചുമതലയാണ്. തീര്‍ച്ചയായും ഇപ്പോഴത്തെ നടപടിക്ക് പ്രത്യാഘാതം ഉണ്ടാകും. അത് താന്‍ സീസണ്‍ തുടങ്ങും മുൻപ് എല്ലാ കളിക്കാരോടും പറഞ്ഞിട്ടുള്ളതാണെന്നും ടെന്‍ ഹാഗ് പറഞ്ഞു. അതേസമയം മോശം പെരുമാറ്റത്തെത്തുടർന്ന് റൊണാൾഡോയെ ചെൽസിക്കെതിരായി ഇന്ന് നടക്കുന്ന മത്സരത്തിൽ നിന്നും ഒഴിവാക്കിയിരുന്നു.
ചെൽസിക്കെതിരെ പുറത്ത്: ചെൽസിയുടെ ഹോം ഗ്രൗണ്ടായ സ്റ്റാംഫോർഡ് ബ്രിഡ്‌ജിലേക്ക് പോകുന്ന സംഘത്തിൽ റൊണാൾഡോ ഉണ്ടാവില്ലെന്ന് യുണൈറ്റഡ് ഔദ്യോഗികമായി അറിയിച്ചു. പിന്നാലെ ടീമിനെയും സഹതാരങ്ങളേയും പരിശീലകരേയും ബഹുമാനിക്കുന്നതാണ് തന്‍റെ രീതിയെന്നും അപ്പോഴുണ്ടായ പ്രയാസത്തിൽ ചെയ്‌ത് പോയതാണെന്നും റൊണാൾഡോ സമൂഹ മാധ്യമങ്ങളിൽ കുറിച്ചിരുന്നു.
പ്രതിഷേധം, ഇറങ്ങിപ്പോക്ക്, വിവാദം: ഇംഗ്ലീഷ് പ്രീമിയർ ലീഗിൽ ടോട്ടൻഹാമിനെതിരായ മത്സരത്തിനിടെയാണ് വിവാദമായ സംഭവങ്ങൾ ഉണ്ടായത്. മത്സരത്തിൽ സബ് ആയി പോലും അവസരം ലഭിക്കാതിരുന്ന റൊണാൾഡോ ഇതിൽ പ്രതിഷേധിച്ച് മത്സരം അവസാനിക്കുന്നതിന് മുൻപ് ബെഞ്ചിൽ നിന്നും ഇറങ്ങിപ്പോകുകയായിരുന്നു.
മത്സരത്തിൽ യുണൈറ്റഡിന്‍റെ അഞ്ച് സബ്‌സ്റ്റിറ്റ്യൂഷനില്‍ മൂന്നെണ്ണം കോച്ച് എറിക് ടെന്‍ ഹാഗ് നടത്തിയിരുന്നു. ബാക്കിയുള്ള രണ്ട് സബ്‌സ്റ്റിറ്റ്യൂഷനില്‍ ഒന്നായിരുന്നു റൊണാള്‍ഡോ. എന്നാൽ അതിലും തനിക്ക് അവസരം ലഭിക്കില്ലെന്ന് മനസിലാക്കിയതോടെ താരം ബെഞ്ചിൽ നിന്ന് മടങ്ങുകയായിരുന്നു. മത്സരത്തിൽ വിജയിച്ച ശേഷം ടീമിന്‍റെ വിജയാഹ്ലാദത്തിലും റൊണാൾഡോ പങ്കെടുത്തില്ല.
തുടർന്ന് താരത്തിന്‍റെ മോശം പ്രവൃത്തിയെക്കുറിച്ച് നേരിട്ട് ചർച്ച ചെയ്യുമെന്നും ടീമിന്‍റെ പ്രകടനത്തിലാണ് ഇപ്പോൾ തന്‍റെ ശ്രദ്ധയെന്നും പരിശീലകൻ എറിക് ടെൻ ഹാഗ് അന്ന് തന്നെ വ്യക്‌തമാക്കിയിരുന്നു. സീസണില്‍ രണ്ടാം തവണയാണ് റൊണാള്‍ഡോ ഇങ്ങനെ ഇറങ്ങിപ്പോകുന്നത്. പിന്നാലെ താരത്തിന് നിഷേധാത്മക നടപടിക്കെതിരെ നിരവധി മുൻ താരങ്ങളും ആരാധകരും രംഗത്തെത്തിയിരുന്നു.
ALSO READ: കളത്തിലിറക്കിയില്ല; പ്രതിഷേധിച്ച് റൊണാൾഡോ, ബെഞ്ചിൽ നിന്ന് ഇറങ്ങിപ്പോയി
പ്രീ സീസണ്‍ പരിശീലനത്തില്‍ നിന്നും സന്നാഹമത്സരങ്ങളില്‍ നിന്നും വിട്ടുനിന്നതിനാല്‍ റൊണാള്‍ഡോയെ മിക്ക മത്സരങ്ങളിലും കോച്ച് ആദ്യ ഇലവനില്‍ ഉള്‍പ്പെടുത്താറില്ല. ഈ സീസണിൽ രണ്ട് തവണ മാത്രമാണ് റൊണാൾഡോയ്‌ക്ക് യുണൈറ്റഡിന്‍റെ ആദ്യ ഇലവനിൽ കളിക്കാൻ സാധിച്ചത്. ഇതുകൊണ്ടുതന്നെ സീസണില്‍ രണ്ടുഗോള്‍ മാത്രമേ റൊണാള്‍ഡോയ്ക്ക് നേടാനായിട്ടുള്ളൂ.
