ന്യൂഡല്‍ഹി: ഇന്ത്യൻ ഫുട്ബോൾ ടീമിന്‍റെ പുതിയ പരിശീലകനായി ക്രൊയേഷ്യൻ മുൻ താരവും പരിശീലകനുമായ ഇഗോർ സ്റ്റിമാക്കിനെ വിദഗ്ധ സമിതി തെരഞ്ഞെടുത്തു. എ ഐ എഫ് എഫിന്‍റെ അംഗീകാരം ലഭിച്ചശേഷമെ ഔദ്യോഗിക പ്രഖ്യാപനമുണ്ടാകു.
എ ഐ എഫ് എഫ് ചുരുക്കപ്പട്ടികയിലുണ്ടായിരുന്ന നാല് പേരില്‍ നിന്നാണ് സ്റ്റിമാക്കിനെ ഇന്ത്യൻ ഫുട്ബോൾ ടീമിനെ നയിക്കാനായി തെരഞ്ഞെടുത്തത്. ബെംഗളൂരു എഫ്സി പരിശീലകൻ ആല്‍ബർട്ട് റോക്കയെ മറികടന്നാണ് ഇഗോറിന് നറുക്ക് വീണത്. റോക്കയ്ക്ക് പുറമെ ലീ മിൻ സങ്, ഹക്കാൻ എറിക്സൻ എന്നിവരും അന്തിമ പട്ടികയിലുണ്ടായിരുന്നു. ക്രൊയേഷ്യ ദേശീയ ടീമിന്‍റെ പരിശീലകനായി ഒരു വർഷത്തിലേറെ പ്രവർത്തിച്ചതാണ് സ്റ്റിമാക്കിന്‍റെ പ്രധാന പരിചയസമ്പത്ത്. 2012-13 കാലഘട്ടത്തിലായിരുന്നു അദ്ദേഹം ക്രൊയേഷ്യയുടെ പരിശീലകനായത്. ഖത്തർ ക്ലബായ അല്‍ ഷഹാനിയയിലാണ് സ്റ്റിമാക്ക് അവസാനമായി പ്രവർത്തിച്ചത്.
ഫുട്ബോൾ താരമെന്ന നിലയില്‍ രണ്ട് പതിറ്റാണ്ടിലേറെ അനുഭവസമ്പത്ത് സ്റ്റിമാക്കിനുണ്ട്. ക്രൊയേഷ്യക്ക് പുറമെ ഇംഗ്ലണ്ട്, സ്പെയ്ൻ തുടങ്ങിയ രാജ്യങ്ങളിലെ ക്ലബുകൾക്കായി സ്റ്റിമാക്ക് കളിച്ചിട്ടുണ്ട്. പ്രതിരോധനിരക്കാരനായി കളിച്ചിട്ടുള്ള സ്റ്റിമാക്ക് 53 മത്സരങ്ങളില്‍ ദേശീയ ടീം ജേഴ്സിയണിഞ്ഞിട്ടുണ്ട്. 1998ല്‍ തങ്ങളുടെ ആദ്യ ലോകകപ്പില്‍ മൂന്നാം സ്ഥാനത്തെത്തി ക്രൊയേഷ്യ ചരിത്രം സൃഷ്ടിച്ചപ്പോൾ സെന്‍റർ ബാക്കായി പ്രതിരോധകോട്ട തീർത്തത് സ്റ്റിമാക്കായിരുന്നു.
മെയ് അവസാനത്തോടെ ദേശീയ ക്യാമ്പ് ആരംഭിക്കാനുള്ളതിനാല്‍ നിയമനം വേഗത്തിലാക്കാനാണ് ഫുട്ബോൾ ഫെഡറേഷൻ ശ്രമിക്കുന്നത്. ജൂൺ ആദ്യ വാരം നടക്കുന്ന കിംഗ്സ് കപ്പാകും ഇഗോർ സ്റ്റിമാക്കിന്‍റെ ആദ്യ ചുമതല.
