ഈ മാസം 15 ന് ആരംഭിക്കുന്ന ഹീറോ സൂപ്പർ കപ്പിൽ നിന്നുംഐ ലീഗ് ടീമുകൾ പിന്മാറുന്നു. ടൂർണമെന്‍റ് തുടങ്ങാൻ രണ്ട് ദിവസം മാത്രം ശേഷിക്കേയാണ് ടീമുകളുടെ പിന്മാറ്റം. ഗോകുലം കേരള ഉൾപ്പടെ ഏഴ് ടീമുകളാണ് സൂപ്പര്‍ കപ്പില്‍ നിന്ന് പിന്മാറുന്നത്. ഐ ലീഗ് ടീമുകൾക്ക് അഖിലേന്ത്യാ ഫുട്ബോൾ ഫെഡറേഷൻ മതിയായ പരിഗണന നൽകുന്നില്ലെന്ന് ആരോപിച്ചാണ് നടപടി.
സൂപ്പർ കപ്പിൽ നിന്ന് പിൻമാറുകയാണെന്ന് മിന‍ർവ പഞ്ചാബും മോഹൻ ബഗാനും ഫുട്ബോൾ ഫെഡറേഷനെ അറിയിച്ചു. മറ്റ് അഞ്ച് ടീമുകളും ഇതേ നിലപാടിലാണെന്നാണ് റിപ്പോർട്ടുകൾ. ഐ ലീഗ് ക്ലബ്ബുകളായ റിയൽ കശ്മീർ, ഷില്ലോംഗ് ലജോംഗ്, ചർച്ചിൽ ബ്രദേഴ്സ്, ഇന്ത്യൻ ആരോസ് എന്നിവർ മാത്രമാണ് സൂപ്പർ കപ്പിൽ കളിക്കുക. വെള്ളിയാഴ്ച്ച മുതൽ ഏപ്രിൽ 13 വരെ ഭുവനേശ്വറിലാണ് സൂപ്പർ കപ്പ് നടക്കേണ്ടത്. ഐ ലീഗിലെയും ഐഎസ് എല്ലിലെയും ടീമുകളാണ് സൂപ്പർ കപ്പിൽ കളിക്കേണ്ടത്.
