ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ ചെല്‍സിക്ക് തോല്‍വി. ഹോം ഗ്രൗണ്ടില്‍ നടന്ന മത്സരത്തില്‍ ഗണ്ണേഴ്‌സിനോട് എതിരില്ലാത്ത ഒരു ഗോളിന്‍റെ പരാജയമാണ് തോമസ് ട്യുഷലിന്‍റെ ശിഷ്യന്‍മാര്‍ ഏറ്റുവാങ്ങിയത്. ആദ്യപകുതിയിലെ 16-ാം മിനിട്ടില്‍ എമിലി റോവ് ഗണ്ണേഴ്‌സിനായി വല കുലുക്കി.
എഫ്‌ എ കപ്പിന്‍റെ കലാശപ്പോരിന് മുമ്പായി നടന്ന മത്സരത്തിലെ തോല്‍വി നീലപ്പടക്ക് ക്ഷീണമുണ്ടാക്കും. കൂടാതെ അടുത്ത സീസണില്‍ ചെല്‍സിയുടെ ചാമ്പ്യന്‍സ് ലീഗ് യോഗ്യതക്കും പരാജയം തിരിച്ചടിയായി മാറും. മത്സരത്തില്‍ പരാജയം ഏറ്റുവാങ്ങിയതോടെ ചെല്‍സിക്ക് വെസ്റ്റ് ഹാം ഉള്‍പ്പെടെ ഭീഷണി ഉയര്‍ത്തുന്നുണ്ട്.
കൂടുതല്‍ കായിക വാര്‍ത്തകള്‍: ഗോളടിച്ച് 'ഹാട്രിക് സെഞ്ച്വറി'; യൂറോപ്പില്‍ റോണോയുടെ പടയോട്ടം
വരുന്ന 15ന് രാത്രി 9.45ന് വിംബ്ലിയിലാണ് എഫ്‌എ കപ്പിന്‍റെ ഫൈനല്‍ പോരാട്ടം. ലെസ്റ്റര്‍ സിറ്റിയാണ് ചെല്‍സിയുടെ എതിരാളികള്‍. പിന്നാലെ ഈ മാസം 29ന് പോര്‍ട്ടോയില്‍ ചാമ്പ്യന്‍സ് ലീഗിന്‍റെ ഫൈനല്‍ പോരാട്ടവും ചെല്‍സിയെ കാത്തിരിക്കുന്നുണ്ട്. യൂറോപ്യന്‍ ചാമ്പ്യന്‍ പോരാട്ടത്തില്‍ മാഞ്ചസ്റ്റര്‍ സിറ്റിയെയാണ് ചെല്‍സി നേരിടേണ്ടത്.
