മലപ്പുറം: മലപ്പുറത്തുകാരുടെ വികാരങ്ങളിലൊന്നാണ് ഫുട്ബോള്‍. കോപ്പയും യൂറോ കപ്പുമെല്ലാം മൈലുകള്‍ക്കപ്പുറമാണ് അരങ്ങേറുന്നതെങ്കിലും ചൂട് മലപ്പുറത്തുകാരുടെ നെഞ്ചിലുണ്ടാവാറുണ്ട്. ഇത്തവണ ലാറ്റിനമേരിക്കന്‍ കിരീടത്തിനായി ബ്രസീലും അർജന്‍റീനയും കളത്തിലിറങ്ങുമ്പോള്‍ ആവേശം തെല്ലൊന്ന് കൂടുതലാണ് ഇക്കൂട്ടര്‍ക്ക്.
സ്വപ്ന ഫൈനലിന് കളമൊരുങ്ങിയതോടെ ചേരി തിരിഞ്ഞുള്ള തീപാറുന്ന ചര്‍ച്ചകളും സജീവം. എന്നാല്‍ ഇരു കൂട്ടര്‍ക്കും ആവേശം പകരുകയാണ് ഉദയൻ എടപ്പാളിന്‍റെ സ്പീഡ് പെയിൻിങ്. അര്‍ജന്‍റീനയുടെ ആരാധകനാണെങ്കിലും സ്വന്തം വീട്ട് ചുമരില്‍ മെസിയോടൊപ്പം നെയ്മറിന്‍റേയും ചിത്രം ഉദയന്‍ വരച്ചിട്ടുണ്ട്.
also read:വിംബിൾ‌ഡണ്‍ പുരുഷ സിംഗിൾസ്: നൊവാക് ജോക്കോവിച്ച് ഫൈനലില്‍
120 സ്ക്വയർ ഫീറ്റിൽ അര മണിക്കൂർ കൊണ്ടാണ് ചിത്രം പൂര്‍ത്തിയാക്കിയത്. പ്രിയപ്പെട്ട ടീം അർജന്‍റീനയാണെങ്കിലും സുഹൃത്തുക്കളായ ബ്രസീൽ ആരാധാകരുടെയും ഇഷ്ടം മനസിലാക്കിയാണ് നെയ്മറേയും ഉള്‍പ്പെടുത്തിയതെന്ന് ഉദയന്‍ പറയുന്നു. കിരീടം നിലനിർത്താൻ നെയ്മറും സംഘവുമിറങ്ങുമ്പോള്‍ 1993ന് ശേഷം ആദ്യ കിരീടത്തിനായാണ് മെസിപ്പടയുടെ തയ്യാറെടുപ്പ്.
