സിഡ്നി: ആഷസ് പരമ്പരയ്ക്കായി നടക്കാനിരിക്കുന്ന ടി20 ലോകകപ്പില്‍ നിന്നും മാറി നില്‍ക്കാന്‍ ഒരുക്കമാണെന്ന് ഓസ്‍ട്രേലിയന്‍ ബാറ്റ്സ്മാന്‍ സ്റ്റീവ് സ്മിത്ത്. 'ആഷസിനാണ് ഞാന്‍ കൂടുതല്‍ പ്രധാന്യം നല്‍കുന്നത്. എനിക്ക് കൂടുതല്‍ സ്വാധീനം ചെലുത്താനാവുന്ന സ്ഥാനത്ത് കളിക്കാനാണ് ഞാന്‍ ഇഷ്ടപ്പെടുന്നത്. എന്നാല്‍ ലോക കപ്പില്‍ കളിക്കാന്‍ ഇഷ്ടപ്പെടുന്നില്ല എന്ന് ഇത് അര്‍ത്ഥമാക്കുന്നില്ല'. സ്മിത്ത് പറഞ്ഞു.
ടെസ്റ്റ് ക്രിക്കറ്റിന് കൂടുതല്‍ പ്രാധാന്യം
'ടി20 ലോകകപ്പ് ടീമിന്‍റെ ഭാഗമാകാന്‍ ആഗ്രഹമുണ്ട്. എന്നാല്‍ ടെസ്റ്റ് ക്രിക്കറ്റിനാണ് കൂടുതല്‍ പ്രാധാന്യം നല്‍കുന്നത്. കഴിഞ്ഞ കുറച്ച് ആഷസുകളില്‍ നടത്തിയ പ്രകടനം ആവര്‍ത്തിക്കാനാണ് ശ്രമം നടത്തുന്നത്. കുറച്ച് ആഴ്ചകളായി പരിക്കില്‍ നേരിയ പുരോഗതി അനുഭവപ്പെടുന്നുണ്ട്. കുറച്ച് നേരം ബാറ്റുചെയ്യാനുമാവുന്നുണ്ട്' എന്നും സ്റ്റീവ് സ്മിത്ത് പറഞ്ഞു.
ആഷസ് ആരംഭിക്കുക ഡിസംബർ എട്ടിന്
അതേസമയം കൈമുട്ടിനേറ്റ പരിക്കിനെ തുടർന്ന് വെസ്റ്റന്‍ഡീസ്, ബംഗ്ലാദേശ് പര്യടനങ്ങളില്‍ നിന്ന് നിലവില്‍ മാറിനില്‍ക്കുകയാണ് സ്മിത്ത്. യുഎഇ, ഒമാന്‍ എന്നിവിടങ്ങളിലായി ഒക്ടോബർ 17 മുതല്‍ നവംബർ 14 വരെയാണ് ടി20 ലോകകപ്പ് നിശ്ചിയിച്ചിരിക്കുന്നത്. അതേസമയം ഡിസംബർ എട്ടിനാണ് ആഷസ് ആരംഭിക്കുക.
also read:കോപ്പയില്‍ മഞ്ഞപ്പട സെമയില്‍; ഏകപക്ഷീയമായ ഒരു ഗോളിന് ചിലിയെ മറികടന്നു
കഴിഞ്ഞ വര്‍ഷം ആഷസില്‍ നാല് ടെസ്റ്റുകളില്‍ നിന്നും 110.57 ശരാശരിയില്‍ 774 റണ്‍സ് താരം കണ്ടെത്തിയിരുന്നു. രണ്ട് ഇരട്ട സെഞ്ചുറികളും ഇതില്‍ ഉള്‍പ്പെടും. അതേസമയം പന്ത് ചുരണ്ടല്‍ വിലക്കിന് ശേഷം അന്താരാഷ്ട്ര ക്രിക്കറ്റില്‍ തിരിച്ചെത്തിയ സ്മിത്തിന്‍റെ ആദ്യ ആഷസ് കൂടിയായിരുന്നു അത്.
