മുംബൈ: വനിത പ്രീമിയര്‍ ലീഗ് ക്രിക്കറ്റില്‍ യുപി വാരിയേഴ്‌സിന്‍റെ മധ്യനിരയില്‍ സ്ഥിരക്കാരിയായ പേരാണ് സിമ്രാൻ ഷെയ്‌ഖ് എന്ന 21-കാരിയുടെത്. ലോകത്തിലെ ഏറ്റവും വലിയ ചേരികളിലൊന്നായ ധാരാവിയിൽ നിന്നും ഏറെ കഷ്‌ടതകള്‍ പിന്നിട്ടാണ് സിമ്രാൻ ഷെയ്‌ഖ് ക്രിക്കറ്റ് ലോകത്ത് ചുവടുറപ്പിക്കുന്നത്. കുട്ടിക്കാലത്ത്, പാർക്കിൽ ക്രിക്കറ്റ് കളിച്ചതിന് ആളുകളുടെ ശകാരം കേട്ടുവളര്‍ന്ന ബാല്യമാണ് സിമ്രാനുള്ളത്.
ഇന്ന് മൈതാനത്തിറങ്ങുമ്പോള്‍ സിമ്രാനായി കയ്യടിക്കുന്നവരില്‍ ഇക്കൂട്ടരും ഉണ്ടാവുമെന്നുറപ്പാണ്. ഇപ്പോഴിതാ ക്രിക്കറ്റിന്‍റെ ലോകത്ത് ചുവടുറപ്പിക്കും മുമ്പ് സിമ്രാന് കടന്നുവന്ന കനല്‍വഴികളെക്കുറിച്ച് സംസാരിച്ചിരിക്കുകയാണ് താരത്തിന്‍റെ പിതാവ് ജാഹിദ് അലി. ശകാരങ്ങളില്‍ തളരാതെ ക്രിക്കറ്റില്‍ ശ്രദ്ധകേന്ദ്രീകരിച്ചായിരുന്നു മകളുടെ യാത്രയെന്നാണ് ജാഹിദ് പറഞ്ഞത്.
"ചെറുപ്പത്തില്‍ തന്നെ ക്രിക്കറ്റ് കളിക്കാൻ അവള്‍ക്ക് ഏറെ താത്‌പര്യമുണ്ടായിരുന്നു. പക്ഷെ ക്രിക്കറ്റ് കളിക്കാനായി ഗ്രൗണ്ടിൽ ഇറങ്ങുമ്പോഴെല്ലാം ധാരാളം ആളുകൾ അവളെ ശകാരിക്കുകയും മറ്റ് ഒരുപാട് കാര്യങ്ങള്‍ പറയുകയും ചെയ്യുമായിരുന്നു. എന്നാൽ അത്തരത്തിലുള്ള എല്ലാ ബഹളങ്ങളെയും അവള്‍ അവഗണിക്കുകയാണ് ചെയ്‌തത്. ക്രിക്കറ്റില്‍ മാത്രം ശ്രദ്ധ കേന്ദ്രീകരിച്ച് മുന്നോട്ട് പോവുകയായിരുന്നു അവള്‍", ജാഹിദ് അലി പറഞ്ഞു.
ക്രിക്കറ്റില്‍ ഒരു കരിയർ കെട്ടിപ്പടുക്കുകയെന്നത് ഏറെ പ്രയാസമുള്ള കാര്യമാണ്. എന്നാല്‍ ലോകത്തിലെ ഏറ്റവും വലിയ വനിത ക്രിക്കറ്റ് ലീഗുകളിലൊന്നിന്‍റെ ഭാഗമാണ് സിമ്രാന്. മകള്‍ക്ക് ഇത്രയും ഉയരത്തിൽ എത്താൻ കഴിയുമെന്ന് താന്‍ കരുതിയിരുന്നില്ലെന്നും ജാഹിദ് അലി പറഞ്ഞു.
"ഇല്ല, ഞാൻ ഒരിക്കലും ഇക്കാര്യം വിചാരിച്ചിരുന്നില്ല. ഞങ്ങൾ വളരെ പാവങ്ങളാണ്. അവളുടെ ഇഷ്‌ടങ്ങളെ പിന്തുണയ്‌ക്കാനും അവളെ സഹായിക്കാനും കഴിയാത്ത അവസ്ഥയിലായിരുന്നു ഞങ്ങള്‍. പക്ഷേ ദൈവാനുഗ്രഹത്താൽ അവൾക്ക് മുന്നോട്ട് പോകാൻ കഴിഞ്ഞു.
ഇന്ന് ഞങ്ങള്‍ക്ക് കിടുന്ന ബഹുമാനം അത്രയും അവളുടെ കഴിവിനാലാണ്. മകളുടെ കഴിവും കഠിനാധ്വാനവും ദൈവകൃപയും കൊണ്ടാണ് ഇന്ന് ഈ നേട്ടം കൈവരിച്ചത്. ഒരുപാട് പേർ ഞങ്ങളെ പിന്തുണയ്‌ക്കുകയും ചെയ്‌തിട്ടുണ്ട്", സിമ്രാന്‍റെ പിതാവ് തുടർന്നു.
സിമ്രാന് ഈ നിലവാരത്തിലേക്ക് വളരാന്‍ കഴിയുമെന്ന് അമ്മ അക്തരി ബാനോയും കരുതിയിരുന്നില്ല. "ക്രിക്കറ്റില്‍ കളിച്ച് ഇത്രയും മുന്നേറാന്‍ അവള്‍ക്ക് കഴിയുമെന്ന് ഞങ്ങൾ വിശ്വസിച്ചിരുന്നില്ല. പ്രയാസകരമായ സമയങ്ങളിൽ ഞങ്ങളുടെ മകളെയും ഞങ്ങളെയും പിന്തുണച്ച കോച്ചിനും ദൈവത്തിനും ഞാൻ നന്ദി പറയുന്നു", അക്തരി ബാനോ പറഞ്ഞു.
പത്താം ക്ലാസിന് ശേഷം പഠനം ഉപേക്ഷിച്ച സിമ്രാൻ തന്‍റെ പരിമിതികളില്‍ തളരാതെ ക്രിക്കറ്റില്‍ ശ്രദ്ധ കേന്ദ്രീകരിക്കുകയായിരുന്നു. നേരത്തെ തങ്ങളുടെ പേരിലാണ് സിമ്രാന് അറിയപ്പെട്ടിരുന്നതെന്നും ഇന്ന് സിമ്രാന്‍റെ അമ്മയെന്ന് ആളുകള്‍ പറയുന്നത് കേള്‍ക്കുന്നതില്‍ അഭിമാനമാണെന്നും അവര്‍ കൂട്ടിച്ചേര്‍ത്തു. വനിത പ്രീമിയർ ലീഗ് ലേലത്തിനിടെ കുടുംബത്തിന്‍റെ വികാരങ്ങളും അക്തരി ബാനോ പങ്കുവച്ചു.
"ഉച്ചയ്‌ക്ക് രണ്ട് മണിക്ക് തന്നെ ടെലിവിഷൻ ഓണാക്കി, അതിന് മുന്നില്‍ നില്‍പ്പുറപ്പിച്ചിരിക്കുകയായിരുന്നു ഞങ്ങള്‍. സിമ്രാന്‍റെ പേര് വരുന്നതിനായാണ് ഞങ്ങള്‍ കാത്തിരുന്നത്. അവൾ മുഴുവൻ സമയവും ആകാംഷയിലായിരുന്നു. പെട്ടെന്നാണ് അവളുടെ പേരു കേള്‍ക്കുന്നത്. അതോടെ ഞങ്ങളുടെ കുടുംബവും ചുറ്റുപാടുള്ള എല്ലാവരും അവേശത്താല്‍ മതിമറന്നിരുന്നു", അവര്‍ കൂട്ടിച്ചര്‍ത്തു.
